Жетісу облыстық С. Сейфуллин атындағы орталық кітапхананың ұйымдастыруымен Орталық Арбат алаңында Қазақстан Республикасының Мемлекеттік рәміздерін дәріптеуге арналған «Ашық аспан астындағы сұхбат» атты танымдық шара өтті, – деп хабарлайды 7-su.kz ақпараттық порталы.
Іс-шараның негізгі мақсаты – тұрғындардың мемлекеттік рәміздер туралы білімін арттыру, олардың тарихи маңызы мен мазмұнын кеңінен насихаттау, сондай-ақ жастар арасында патриоттық құндылықтарды қалыптастыру.
Шара барысында қала тұрғындарымен ашық форматта пікір алмасу ұйымдастырылып, Мемлекеттік Ту, Елтаңба және Әнұранға қатысты сұрақтар қойылды. Қатысушылар рәміздердің шығу тарихы, олардың қоғамдағы орны мен маңызы жөнінде өз ойларын ортаға салып, белсенділік танытты.
Кездесу аясында мемлекеттік рәміздердің ел тәуелсіздігінің символы екендігі, олардың ұлттық бірегейлікті нығайтудағы рөлі мен жас ұрпақты отансүйгіштікке тәрбиелеудегі маңызы кеңінен сөз болды.
Ұйымдастырушылардың айтуынша, мұндай тағылымдық іс-шаралар азаматтардың тарихи санасын қалыптастырып, мемлекеттік нышандарға деген құрметін арттыруға ықпал етеді.
Танымдық шараға жалпы саны 50 адам қатысты. Қатысушылар елдің басты құндылықтарын дәріптеуге бағытталған бастаманың маңыздылығын атап өтіп, өздерінің оң пікірлерін білдірді.
