Жетісу гарнизонына қарасты 54380 әскери бөлімінде салтанатты Әскери ант қабылдау рәсімі өтті. Іс-шара барысында Алматы қаласынан мерзімді әскери қызметке шақырылған 100-ге жуық жас сарбаз Отан алдындағы қасиетті борышын адал атқаруға ант берді.
Салтанатты рәсімге жас жауынгерлердің ата-аналары, туыстары мен жақындары арнайы келіп, олардың өміріндегі маңызды сәттің куәсі болды. Әскери ант қабылдау – әрбір сарбаздың әскери өміріндегі жауапты кезеңдердің бірі. Бұл күн жас жауынгерлердің ел қауіпсіздігін қамтамасыз ету жолындағы қызметінің бастауы болып саналады.
Шараға Қазақстан Республикасы Қарулы Күштерінің ардагерлері запастағы 1-рангты капитан Рахым Қырғабақов пен запастағы полковник Ринат Ахметов қатысты. Ардагерлер жас сарбаздарды құттықтап, әскери қызметтің маңыздылығы туралы айтып, Отанға адал қызмет етудің абыройлы міндет екенін атап өтті. Олар сарбаздарға мықты денсаулық, табандылық пен әскери қызметтерінде сәттілік тіледі.
Салтанатты жиында әскери бөлім басшылығы да сөз сөйлеп, жас жауынгерлердің алдағы қызметіне табыс тіледі. Сонымен қатар сарбаздар өздерінің алғашқы әскери машықтарын көрсетіп, қонақтарға арнайы дайындалған әскери көрсетілім ұсынды. Көрсетілім барысында саптық дайындық элементтері мен әскери даярлық көріністері көрсетілді.
Мерекелік шара барысында патриоттық әндер орындалып, қатысушыларға көтеріңкі көңіл-күй сыйлады. Жиналған қауым жас сарбаздардың өнері мен дайындығына жоғары баға берді.
Әскери ант қабылдау рәсімі жас жауынгерлердің бойында отансүйгіштік рухты нығайтып, әскери қызметтің жауапкершілігін терең сезінуге мүмкіндік берді. Бұл маңызды оқиға олардың ел тыныштығы мен қауіпсіздігін қорғауға бағытталған қасиетті қызмет жолындағы алғашқы қадамдарының бірі болды.
Жетісу гарнизонының баспасөз қызметі
