Жетісу облысында мүгедектігі бар азаматтардың цифрлық сауаттылығын арттырып, жаңа кәсіби дағдыларды меңгеруіне бағытталған әлеуметтік жоба жүзеге асырылуда. Оқыту жұмыстары Алакөл жағалауындағы арнайы бейімделген «Алакөл Асар» демалыс базасында өтуде.
Өңірлік коммуникациялар қызметінде өткен брифингте жоба жетекшісі Елдос Баялышбаев пен ұйымдастырушы Азамат Оспанов бастаманың жүзеге асырылу барысы туралы мәлімет берді.
Жоба аясында 100 адамды қамтитын бес оқыту легі ұйымдастырылады. Сабақ қазақ, орыс және ымдау тілдерінде жүргізіледі. Әр курс кемінде 20 академиялық сағаттан тұрып, қорытынды тестілеумен аяқталады.
Бағдарламаға бүгінгі еңбек нарығында сұранысқа ие бірнеше бағыт енгізілген. Қатысушылар мобилография, фото және бейнемонтаж негіздерін меңгеріп, психологиялық қолдау курстарынан өтеді. Сонымен қатар жасанды интеллект пен нейрожелілерді қолдану, фриланс және кәсіпкерлік негіздері бойынша білім алады.
Оқу ерекше қажеттіліктері бар азаматтарға қолайлы жағдай жасалған демалыс базасында ұйымдастырылған. Мұнда кедергісіз орта қалыптастырылып, қатысушылардың білім алуына, қарым-қатынас жасауына және демалуына қажетті инфрақұрылым қарастырылған.
«Жобаның басты мақсаты – мүмкіндігі шектеулі жандардың цифрлық және кәсіби дағдыларын арттырып, олардың еңбек нарығында өз орнын табуына мүмкіндік жасау. Облыс әкімі Бейбіт Исабаев пен ішкі саясат басқармасының қолдауының арқасында 100 қатысушыға арналған оқу курстары тегін ұйымдастырылып отыр. Әр лек бойынша оқу мерзімі 4 күнді құрайды. Жоба аясында қатысушылардың жол ақысы, тұру шығындары және спикерлердің қызметі толық қамтылған. Бір жылға арналған жобаның жалпы бюджеті 19 миллион теңгені құрайды», – деді «Асар» оңалту орталығының директоры, жоба жетекшісі Елдос Қайыркенұлы.
Жобаға ерекше қажеттіліктері бар адамдармен жұмыс тәжірибесі мол тренерлер мен сарапшылар тартылған. Оқыту легтері маусым мен тамыз айлары аралығында өтеді.
