Талдықорғанда этнос арасындағы достық пен татулықты дәріптейтін «Этно-Song» атты концерт өтті. Мәдени шараға оннан астам этнос өкілдері жиналып, өздерінің төл мәдениетін, ана тіліндегі әндері мен мың бұралған билерін көрермен назарына ұсынды.
Кеш шымылдығын ашқан облыстық ішкі саясат басқармасы «Қоғамдық келісім» КММ директорының міндетін атқарушы Айдос Игенбайдың айтуынша, мұндай іс-шара жыл сайын тұрақты түрде өткізіледі.
– Әр ұлттың мәдениетін тануға, тарихы мен мұрасы туралы білуге ықпал ететін шараның кейінгі ұрпаққа берері мол. Музыка – өнердің бір бөлігі болғандықтан, әр ұлттың әндерін білуге міндеттіміз. Бұл өзара бәсекелесетін байқау емес. Әр қатысушы өзін еркін әрі жайлы сезінуі үшін жас ерекшелігіне де шектеу қоймадық. Ең бастысы – достық, ынтымақ, береке болсын, – деді.
Шығармашылық кеште жанды дауыста ән шырқап, мың бұрала би билеген өнерпаздардың өнері көпшіліктің көңілінен шықты. Орыс мәдениетін көрсеткен 10 жасар Татьяна Рыльцева сахнада қазақ және поляк тілдерінде ән шырқап, көрерменнің ыстық ықыласына бөленді.
– Кішкентай күнімде інімді тербетіп отырып-ақ ән шығарып айтатынмын. Қазір музыкалық мектепте пианино мен вокал сыныбында оқимын. Сахнаға алғаш алып шыққан әнімнің бірі – «Аист на крыше». Ата-анам да ән айтқанымды қатты қолдады. Үйге қонақ келгенде де үнемі ән айтып беремін. Болашақта да өнер жолын жалғастырамын, – дейді жас талант Татьяна.
Жас дарындардың бойына ұлттық құндылықтарды сіңіруде ұстаздардың да еңбегі орасан.
– Балаларды өздерінің төл мәдениетіне, ата-бабаларының дәстүріне баулу – өте қажет. Осындай ауқымды іс-шаралар бізге ауадай қажет. Этно-мәдениетті ұрпақтан-ұрпаққа жеткізіп отыруға міндеттіміз. Қаратал ауданында би ансамблінде солист те болдым. Сондықтан бүгінгі әнім арқылы да біздің мәдениеттегі қыз балаға деген сыйластық пен нәзік сезімді, қыздың ар-намысын биік қою дәстүрін көрсеткім келді, – дейді шешен тілінде махаббат туралы ән шырқаған мектеп мұғалімі Ахмад Мучураев.
«Этно-Song» кешінде бақ сынасып, жүлдеге таласқан ешкім болған жоқ. Концерттің басты ерекшелігі де осында. Іс-шара соңында ұйымдастырушылар әрбір қатысушының өнерін жоғары бағалап, арнайы марапаттар мен естелік сыйлықтар табыстады.
Жәнел ҚҰМАРЖАН,
ЕҰУ филология факультетінің студенті
