«Қайрат» футбол клубы испаниялық шабуылшы Марк Гуальмен келісімшартқа келгенін ресми жариялады. Келісім 2027 жылдың соңына дейін есептелген, – деп хабарлайды 7-su.kz ақпараттық порталы.
Марк Гуаль Каталонияның Бадалона қаласында дүниеге келген. Ол «Бадалона», «Барселона» және «Эспаньол» клубдарының академияларында тәрбиеленді. Өзінің кәсіби мансабында «Севилья Атлетико», «Сарагоса», «Жирона», «Реал Мадрид Кастилья» және «Алькоркон» сияқты командаларда ойнады.
2022 жылдың көктемінде Гуаль польшалық «Ягеллония» клубына ауысты. 2022/23 жылғы маусымның қорытындысы бойынша ол Польша чемпионатының үздік сұрмергені атанып, «Үздік шабуылшы» деп танылды. 2023 жылдың жазында варшавалық «Легия» клубының қатарына қосылып, командамен бірге Польша Кубогы мен Суперкубогын жеңіп алды. 2024/25 жылғы маусымда барлық турнирлерде 19 гол соғып, команданың үздік бомбардирі болды (оның ішінде УЕФА Конференция лигасында 7 гол салды).
«Қайратқа» ауысар алдындағы шабуылшының соңғы клубы Португалия жоғары дивизионында өнер көрсететін «Риу Аве» болды.
Гуаль Испанияның жастар құрамасы (U-21) сапында 3 матч өткізген.
