Соңғы күндері әлеуметтік желілер мен бірқатар бұқаралық ақпарат құралдарында 2026 жылғы 1 шілдеден бастап Қазақстанда тұрғын үйлердің маңына автокөлік қоюға тыйым салынатыны туралы ақпарат кеңінен тарады. Бұл хабар қоғамда алаңдаушылық туғызып, тұрғындар арасында түрлі пікірлердің қалыптасуына себеп болды. Алайда Өнеркәсіп және құрылыс министрлігі аталған мәліметтің шындыққа сәйкес келмейтінін мәлімдеді.
Ведомствоның түсіндіруінше, Қазақстан Республикасы Өнеркәсіп және құрылыс министрінің «Қалалар мен елді мекендер аумақтарын абаттандырудың үлгілік қағидаларын бекіту туралы» бұйрығында тұрғын үйлердің жанында автокөліктерді қоюға қатысты жаңа тыйымдар қарастырылмаған.
Министрлік өкілдерінің айтуынша, құжаттың негізгі мақсаты – Қазақстан Республикасының Құрылыс кодексіне сәйкес қалалар мен ауылдарды абаттандыру қағидаларын жаңарту. Қабылданған өзгерістер елді мекендердің тазалығы мен тәртібін қамтамасыз етуге бағытталған. Сондықтан жаңа ережелерде арнайы белгіленген тұрақ орындарында көлік қоюға шектеу енгізу мәселесі қарастырылмаған.
Қоғамда түсінбеушілік туғызған жайттардың бірі – қағидалардың 32-тармағына енгізілген өзгерістер. Бұған дейін құжатта жеке тұрғын үйлерге іргелес аумақтарда сақтауға тыйым салынған заттар қатарында «өзге де жылжымалы заттар» деген жалпылама түсінік қолданылған. Ал жаңартылған нұсқада бұл ұғым нақтыланып, оған автомобильдер, тіркемелер мен арбалар да жататыны көрсетілген.
Алайда министрлік бұл өзгеріс автокөліктерді пайдалануға немесе заңды түрде тұраққа қоюға тыйым салуды білдірмейтінін ерекше атап өтті.
– Бұл жерде мәселе көлік құралдарын арнайы орындарға қоюға емес, ортақ пайдаланылатын аумақтарды ұзақ уақыт бойы жеке мүлік сақтау орнына айналдыруға жол бермеуге қатысты болып отыр. Яғни тұрғын үй маңындағы қоғамдық кеңістікте көлікті, тіркемені немесе басқа да мүлікті ұзақ уақыт қараусыз қалдыруға және үйіп қоюға болмайды, – делінген ведомство түсіндірмесінде.
Сондай-ақ министрлік жаңа қағидалар жол қозғалысын ұйымдастыруға, автотұрақтарды реттеуге немесе көлік құралдарын пайдалану тәртібіне қатысты мәселелерді қамтымайтынын хабарлады. Бұл бағыттағы нормалар басқа заңнамалық актілермен реттеледі.
Осыған байланысты тұрғын үйлердің маңына автокөлік қоюға жаңа шектеулер енгізіледі деген ақпараттың шындыққа жанаспайтыны белгілі болды.
Өнеркәсіп және құрылыс министрлігі азаматтарды тек ресми ақпарат көздеріне сенуге шақырып, нормативтік-құқықтық актілерге қатысты тексерілмеген мәліметтерді таратудан сақ болуға үндеді.
Мамандардың пікірінше, мұндай жағдайлар құқықтық құжаттардың жекелеген тармақтарын толық түсіндірмей жариялаудан туындайды. Сондықтан кез келген өзгеріс туралы ақпаратты мемлекеттік органдардың ресми түсіндірмелері арқылы нақтылап отырған жөн.
Қорытындылай келе, 2026 жылғы 1 шілдеден бастап тұрғын үйлердің маңына автокөлік қоюға тыйым салынады деген ақпарат шындыққа сәйкес келмейді. Жаңа қағидалар көлік тұрақтарын шектеуді емес, қоғамдық аумақтарды ретсіз мүлік сақтайтын орынға айналдырудың алдын алуды көздейді.
Санжар СҰЛТАНҒАЗЫ
