Жетісу өңірі әлемдік деңгейдегі маңызды спорттық шараға куә болуда. Текелі тауының баурайында параплан спортынан әлем чемпионаты басталып, аспан кеңістігін бағындыруға келген 33 елдің үздік спортшылары бас қосты, – деп хабарлайды 7-su.kz ақпараттық порталы «Qazaqstan» Ұлттық телеарнасына сілтеме жасап.
Аталған жарыс – әуе спортындағы ең беделді бәсекелердің бірі. Мұнда 100-ден астам спортшы бақ сынап, өздерінің ұшу шеберлігін паш етуде. Қазақстан құрамасының намысын 7 спортшы қорғап, жергілікті таулы аймақтағы ауа ағындарын барынша тиімді пайдалануға тырысуда. Текелі аймағындағы желдің тұрақты бағыты мен қолайлы таулы жер бедері мұндай халықаралық доданы өткізуге өте қолайлы.
Жарыстың басты ерекшелігі – жылдамдықтан гөрі ұшу шеберлігі мен тактикалық сауаттылықты алға қоюында. Спортшылар картада көрсетілген арнайы нүктелер арқылы жүріп өтіп, табиғи ауа ағындарын қолдану арқылы биікке көтеріледі. Үш аптаға созылатын доданың соңында жеңімпаздар жүріп өткен қашықтығы мен жинаған ұпайының қорытындысы бойынша анықталады. Әр қатысушы жарыс аяқталғанша шамамен 300 шақырым қашықтықты ұшып өтуді мақсат етеді.
«Бұл жарыста ең қиыны – картадағы нүктелерді дәл табу. Біз құстарға қарап, көтеріліп жатқан шаңға назар аударамыз. Осы арқылы ыстық ауаның көтерілетін жерін тауып, ұзақ қашықтыққа қалықтаймыз», – дейді жарысқа қатысушы Шыңғыс Баширов.
Текелі таулары парапланшылар үшін жаңалық емес. 2015 жылдан бері мұнда дәлдікке қону бойынша сынға түсіп келген спортшылар, биыл алғаш рет ұзақ қашықтыққа ұшу жарысын сынап жатыр. Ұйымдастырушылардың пікірінше, бұл форматтағы бәсекені өткізу анағұрлым жауапкершілікті талап етеді. Себебі әр спортшының бағытын бақылау, қауіпсіздігін қамтамасыз ету – күрделі процесс.
«Спортшылар әр аймақтың ауа райына қарай бағытты өздері таңдайды. Сондықтан жарыс әділетті өтеді», – дейді ұйымдастырушы Игорь Виршки.
Соңғы жылдары параплан спортына қызығушылық артуда. Ұйымдастырушылар алдағы уақытта жарыстардың географиясын кеңейтіп, келесі жылдан бастап Алакөл мен Балқаш жағалауларында да ірі әуе спорты сайыстарын өткізуді жоспарлап отыр. Мұндай ірі жобалар туризмді дамытуға және Қазақстанның әлемдік спорт картасындағы орнын нығайтуға септігін тигізеді.
