Қазақстан Республикасы Премьер-министрінің орынбасары – Мәдениет және ақпарат министрі Аида Балаева қазақстандықтарды Әкелер күнімен құттықтап, әкенің отбасы мен қоғамдағы айрықша рөлін атап өтті, – деп хабарлайды 7-su.kz ақпараттық порталы.
Министрдің айтуынша, қазақ қоғамында әке қашанда отбасының тірегі, ұрпақ тәрбиесінің темірқазығы саналған. Бүгінде отбасы институтын нығайту және жауапты әке болу мәдениетін дамыту мемлекеттік саясаттың маңызды бағыттарының біріне айналып отыр.
– Бүгінгі қазақстандық әке – тек отбасының асыраушысы мен қорғаны ғана емес. Ол бала тәрбиесіне белсенді араласатын, оның жан дүниесін түсініп, болашағына бағыт-бағдар беретін тұлға. Әкенің қамқорлығы, сенімі және перзентімен бірге өткізген әрбір сәті ұрпақтар арасындағы рухани байланысты нығайтып, ел ертеңіне жауапты азаматтарды тәрбиелеуге қызмет етеді, – деді Аида Балаева.
Министрдің сөзінше, отбасы құндылықтарының маңызы Қазақстан Республикасының Конституциясында да айқын көрініс тапқан. Қазіргі таңда еліміздің барлық өңірінде мектептер жанынан құрылған 500-ден астам Әкелер кеңесі жұмыс істеп келеді.
Сонымен қатар «Әкелер одағы» мен «Ата-аналар академиясы» жобалары жүзеге асырылып, ата-аналардың тәрбиелік әлеуетін арттыруға бағытталған жұмыстар жүргізілуде.
Аида Балаева барлық әкелерді мерекемен құттықтап, оларға зор денсаулық, бақ-береке және отбасылық бақыт тіледі.
