Сенат Қазақстан мен Қырғызстан арасында елшіліктер мен төтенше және өкілетті елшілердің ресми резиденцияларын орналастыруға арналған жер учаскелері мен жылжымайтын мүлікті өзара беру туралы заңды мақұлдады, – деп хабарлайды 7-su.kz ақпараттық порталы.
Құжатқа сәйкес, екі мемлекет бір-біріне өз астаналарында елшілік ғимараттары мен елшілердің ресми резиденцияларын орналастыру үшін жер учаскелері мен нысандарды өтеусіз пайдалануға береді. Пайдалану мерзімі – 49 жыл.
Қазақстан Қырғызстанға Астана қаласында елшілік салу үшін көлемі 0,74 гектар жер учаскесін, сондай-ақ елшінің ресми резиденциясы ретінде ауданы 1267 шаршы метр болатын жеке коттедж ұсынады.
Ал Қырғызстан Қазақстанға Бішкек қаласында елшілік салуға арналған 0,75 гектар жер учаскесін және ауданы 531 шаршы метр болатын елші резиденциясын береді.
– «Жылжымайтын мүлік екі мемлекетте алынатын салық пен алымдардың барлық түрінен босатылады. Тараптар ғимараттарды салу, жөндеу және күтіп ұстау, сондай-ақ, қабылдаушы мемлекетте қолданылатын тарифтерге сәйкес коммуналдық қызметтерге жұмсалатын барлық шығынды өздері төлейді», – деді Сенат депутаты Андрей Лукин.
