Үштөбе гарнизонында орналасқан 55078 әскери бөлімінің құрылғанына 85 жыл толуына арналған салтанатты іс-шара аудандық Мәдениет үйінде өтті.
Ел қорғанысын қамтамасыз етуде өзіндік орны бар әскери бөлімнің мерейтойына арнайы қонақтар қатысты. Атап айтқанда, ҚР Қарулы Күштері Әуе қорғанысы күштері бас қолбасшысының орынбасары, авиация генерал-майоры Ержан Нильдибаев, Қаратал ауданының әкімі Ұлан Досымбеков, әскери сала ардагерлері, құқық қорғау органдарының өкілдері, әскери қызметшілер мен олардың отбасы мүшелері мерейтой иелерін құттықтап, ізгі лебіздерін білдірді.
Салтанатты жиында 55078 әскери бөлімінің командирі полковник Арман Құдайбергенов сөз сөйлеп, бөлімнің қалыптасу тарихына тоқталды. Ол әскери бөлімнің бүгінгі жетістіктері мен жауынгерлік даярлығы, ел қауіпсіздігін қамтамасыз етудегі маңызды міндеттері туралы айтып, әскери қызметшілердің адал еңбегіне жоғары баға берді.
Мерейтой аясында әскери борышын мінсіз атқарып жүрген бірқатар әскери қызметші төсбелгілермен, құрмет грамоталарымен және алғыс хаттармен марапатталды.
Тарихы терең әскери бөлім 1941 жылдың 3 шілдесінде ІІ Дүниежүзілік соғыстың ауыр кезеңінде Өзбекстанның Ташкент облысы, Сырдария ауданында құрылған. Кейін 1970 жылы стратегиялық маңызды міндеттерді орындау мақсатында Жетісу облысының (бұрыңғы Алматы облысы) Қаратал ауданына қоныс аударып, бүгінгі күнге дейін ел қорғанысын нығайту жолында үздіксіз қызмет етіп келеді. 1992 жылы Қазақстан Республикасы Президентінің Жарлығына сәйкес әскери бөлім Қазақстан Республикасы Қарулы Күштерінің Әскери-әуе күштері құрамына енгізілді. Содан бері әскери ұжым мемлекеттің әуе кеңістігінің қауіпсіздігін қамтамасыз етуге, жауынгерлік әзірлікті жетілдіруге және ел тыныштығын сақтауға өлшеусіз үлес қосып келеді.
Мерекелік іс-шара соңы концерттік бағдарламаға ұласты. Әуелеген ән мен күмбірлеген күй, патриоттық рухтағы шығармалар көрерменге көтеріңкі көңіл күй сыйлады.
Жетісу гарнизонының баспасөз қызметі
