Қазақстанда 2030 жылға дейін жаңа газ өңдеу зауыттары іске қосылып, ішкі тұтынуға арналған тауарлық газ өндіру көлемі кезең-кезеңімен артады. Бұл туралы Үкімет отырысында Энергетика министрі Ерлан Ақкенженов мәлімдеді, – деп хабарлайды 7-su.kz ақпарттық порталы.
Министрдің айтуынша, ішкі тұтынуға арналған тауарлық газ өндірісі 2025 жылғы 27,4 млрд текше метрден 2032 жылға қарай 35,5 млрд текше метрге дейін ұлғаяды. Бұл – 29,6 пайыздық өсім.
«Өсім Қашаған мен Қарашығанақта қайта өңдеу қуаттарын іске қосу есебінен қамтамасыз етілетін болады. Бұл инфрақұрылымды кеңейтуге және өңірлерді газбен тұрақты жабдықтауға кепілдік береді. 2027–2030 жылдар аралығында тауарлық газдың қосымша көлемі 1,6 млрд текше метрге, 2031 жылы – 2,3 млрд текше метрге, ал 2032 жылы 6,6 млрд текше метрге жетеді», – деді Ерлан Ақкенженов.
Министрдің сөзінше, саланың басым міндеттерінің бірі – инфрақұрылымдық нысандарды белгіленген мерзімде іске қосу.
2025 жылдың қазан айында «Талдықорған – Үшарал» магистральдық газ құбыры пайдалануға берілді. Сонымен қатар биылғы жылдың соңына дейін «Бейнеу – Бозой – Шымкент» магистральдық газ құбырының екінші желісінің желілік бөлігінің бірінші кезеңін аяқтау жоспарланған. Ал жобаның екінші кезеңін 2029 жылы аяқтау көзделіп отыр. Нәтижесінде газ құбырының өткізу қуаты жылына 15 млрд текше метрге дейін ұлғаяды.
Сондай-ақ 2027 жылы Қашаған кен орнында жылына 1 млрд текше метр газ өңдейтін газ өңдеу зауытын (ГӨЗ) және Жаңаөзен қаласында жылдық қуаты 0,9 млрд текше метр болатын «ҚазГӨЗ» зауытын пайдалануға беру жоспарланған.
Ал 2030 жылға қарай Қашағанда жылына 2,5 млрд текше метр газ өңдейтін тағы бір ГӨЗ бен Қарашығанақта жылдық қуаты 5 млрд текше метр болатын газ өңдеу зауыты іске қосылады деп жоспарланып отыр.
«Осы жобаларды жүзеге асыру газды қайта өңдеу көлемін ұлғайтуға, газ тасымалдау инфрақұрылымын кеңейтуге және өңірлерді тұрақты газбен жабдықтауға мүмкіндік береді», – деді Энергетика министрі Ерлан Ақкенженов.
