Текелі қаласындағы «Делай добро! Текелі» волонтерлер қозғалысы қоғамға пайдалы бастамаларымен көпшіліктің ықыласына бөленіп жүр. Қозғалыс жетекшісі Халықаралық волонтерлер жылы аясында атқарылып жатқан ауқымды іс-шаралар туралы бөлісті, – деп хабарлайды 7-su.kz ақпараттық порталы.
Халида Құсанова басқаратын ұйым 2018 жылдан бастап, яғни 8-9 жылдан бері аймақтағы волонтерлік мәдениетін дамытуда белсенді рөл атқарады. Қозғалыстың басты міндеті – мұқтаж жандарға қолдау көрсету және әлеуметтік маңызы бар жобаларды жүзеге асыру. Еріктілер тобы әлеуметтік осал топтарға, жалғызбасты қарттарға және мүмкіндігі шектеулі азаматтарға үнемі қайырымдылық көмек ұйымдастырады.
Экологиялық бағыт та назардан тыс қалған емес. Еріктілер сенбіліктер өткізіп, ағаш отырғызу акциялары арқылы қаланың тазалығы мен жасыл желекке орануына үлес қосады. Сонымен қатар, жастар арасында еріктілер қозғалысын насихаттауға арналған кездесулер мен патриоттық тәрбиеге бағытталған шаралар тұрақты сипат алған.
Қозғалыс мүшелері төтенше жағдайлар кезінде құтқару қызметтеріне қолғабыс етіп, жоғалған адамдарды іздестіру сияқты жауапты жұмыстарға қатысады. Халида Есболқызы волонтерлікті жай ғана көмек емес, қоғам алдындағы азаматтық жауапкершілік деп санайды. Оның айтуынша, жанашырлық таныту және адамдарға қол ұшын созу әрбір белсенді азаматтың борышы.
Еріктілер тобы алдағы уақытта да игі бастамаларды жалғастырып, халықтың игілігі үшін аянбай еңбек етуді мақсат етеді. Қоғамдағы мейірімділік пен жауапкершілік құндылықтарын арттыру жолындағы мұндай жобалар аймақтың дамуына оң әсерін тигізеді.
