Алматыда әлемге әйгілі актер Джеки Чанның қатысуымен «Armour of God: Ultimatum» («Доспехи бога: Ультиматум») халықаралық көркем фильмінің түсірілімі ресми түрде басталды, – деп хабарлайды 7-su.kz ақпараттық порталы.
Кино саласындағы бұл ауқымды жоба Қазақстанның мәдени, туристік әлеуетін арттырып, кинотуризмді дамытуға жаңа серпін бермек.
Салтанатты іс-шараға ҚР Премьер-Министрінің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев пен халықаралық киноиндустрия өкілдері қатысты. Министр Аида Балаева Джеки Чанның Қазақстан мен Қытай арасындағы мәдени-гуманитарлық байланыстарды нығайтуға қосқан үлесін ерекше атап өтіп, шығармашылық топқа табыс тіледі.
«Қазақстан мәдениетін әлемдік аренада танытуға және екі ел арасындағы мәдени байланысты нығайтуға қосқан үлесіңіз үшін алғыс білдіремін. Алдағы түсірілім жұмыстарына сәттілік тілеймін», – деді Аида Балаева.
Әйгілі актер кездесу аясында Т. Жүргенов атындағы Қазақ ұлттық өнер академиясының түлектері мен талантты жас суретшілермен сұхбаттасты. Ол жас кинематографистерге үздіксіз ізденістің және өз ісіне деген адалдықтың маңызын айтып, шығармашылық жолдарына сәттілік тіледі. Өз кезегінде жастар актерге портреттерін тарту етті.
Жобаны ҚР Мәдениет және ақпарат министрлігі мен Қытайдың мемлекеттік China Film Group Corporation компаниясы қолдап отыр. Фильмді қазақстандық Sәlem Entertainment және гонконгтық Billion Target компаниялары бірлесіп түсіреді. Картинаның қоюшы режиссері – отандық маман Роберт Кун.
Түсірілім 2026 жылғы шілде мен қазан айлары аралығын қамтып, Алматы қаласы мен Алматы және Маңғыстау облыстарында өтеді. Туынды кең халықаралық прокатқа жол тартпақ. Мұндай ірі жоба Қазақстанды әлемдік деңгейдегі кино алаңы ретінде танытып, инвестициялық мүмкіндіктерді кеңейтеді. Еліміздің табиғаты мен мәдениетін әлемге паш ететін бұл картина – отандық киноиндустрия үшін зор мүмкіндік. Саяси және мәдени байланыстарды нығайтатын кинотуындының нәтижесін жанкүйерлер асыға күтеді.
