11 шілдеден бастап республикалық маңызы бар «Талдықорған – Өскемен» автомобиль жолы ақылы негізде пайдалануға беріледі.
Елдегі кез келген өзгеріс қоғамда сұрақ тудырады. Әсіресе, ол халықтың күнделікті өміріне тікелей әсер ететін шешім болса. «Талдықорған – Өскемен» республикалық автожолының ақылы негізге көшуі де жүргізушілер арасында «Жол ақысы қанша?», «Қандай көліктер төлемнен босатылады?», «Жиналған қаражат қайда жұмсалады?» секілді түрлі сауалдың туындауына себеп болды.
Енді соның жауабына бірге үңілейік. Ақылы учаскенің жалпы ұзындығы 772,955 шақырымды құрайды. Жол Алматы — Талдықорған — Өскемен — Шемонаиха — Ресей Федерациясы шекарасы бағытындағы халықаралық және республикалық маңызы бар көлік дәлізінің құрамына кіреді.
Ертеден көші түзу, сапары оң болғанын тілеу қылған халқымыз жол қадірін жақсы біледі. «Жақсы жол ұзақ та болса жақын…» деп, жол сапасының жолаушы үшін маңызды екенін бағамдайды. Бүгінде жолдың жақсы болуы һәм солай сақталуы үшін оны ақылы негізге ауыстыру әлемдік тәжірибеде қолданылып келе жатқан жүйе. Осы ретте, мақалаға тұздық болған автомобиль жолының ақысы қанша әрі ол қалай есептелетіні жөнінде Жетісу облысының жолаушылар көлігі және автомобиль жолдары басқармасы басшысының орынбасары Айдос Досжанов өз мәлімдемесінде толық ақпарат беріп өтті:
- Жеңіл автокөліктер үшін алдын ала төлем жасаған жағдайда жол ақысы 101 теңгені (0,0235 АЕК), ал кейін төленген жағдайда 118 теңгені (0,0272 АЕК) құрайды.
- 16 орынға дейінгі автобустар мен жүк көтергіштігі 2,5 тоннаға дейінгі жүк көліктері үшін тариф алдын ала төлем кезінде 5 035 теңге (1,1643 АЕК), кейін төленген жағдайда 5 920 теңге (1,3688 АЕК) болып белгіленген.
- 32 орынға дейінгі автобустар мен жүк көтергіштігі 5,5 тоннаға дейінгі жүк көліктері алдын ала төлем жасағанда 10 152 теңге (2,3473 АЕК), ал кейін төлегенде 11 920 теңге (2,7562 АЕК) төлейді.
- 32 орыннан асатын автобустар мен жүк көтергіштігі 10 тоннаға дейінгі автопоездар үшін алдын ала төлем мөлшері 15 180 теңгені (3,5099 АЕК), кейінгі төлем 17 836 теңгені (4,1241 АЕК) құрайды.
- Жүк көтергіштігі 10 тоннадан 15 тоннаға дейінгі жүк көліктері алдын ала төлем жасаған жағдайда 20 263 теңге (4,6853 АЕК), ал кейін төлем жасағанда 23 848 теңге (5,5142 АЕК) төлейді.
- Ал жүк көтергіштігі 15 тоннадан асатын жүк көліктері, оның ішінде тіркемелер мен тартқыштар үшін жол ақысы алдын ала төлем кезінде 25 292 теңге (5,8479 АЕК), ал кейін төленген жағдайда 29 761 теңгені (6,8812 АЕК) құрайды.
Байқағанымыздай, жол ақысын алдын ала төлеу (алдын ала теңгерімді толтыру) кейін төлегеннен қарағанда шамамен 15% арзанға түседі.
Егер бұл жолмен жиі қатынайтын болсаңыз, жылдық абонемент сатып алған әлдеқайда тиімді:
- Жеңіл автокөліктер үшін: 1 АЕК = 4 325 теңге (бір жылға).
- Жүк көліктері үшін: Салмағы мен жүк көтергіштігіне қарай 20-дан 100 АЕК-ке дейін, яғни 86 500 теңгеден 432 500 теңгеге дейін.
Ақылы жолдың орнына тегін айналып өту жолын таңдауға да болады: Талдықорған – Үштөбе – Молалы – Лепсі – Ақтоғай – Таңсық – Аягөз – Қарауыл – Семей (облыстық маңызы бар жол) және ары қарай Семей – Өскемен республикалық тасжолы. Алайда, бұл жолдардың барлығы бірдей қолайлы деуге келмейді. Кейбір учаскелер негізгі бағыттан едәуір ұзақ болса, енді бір бөлігінде жол сапасы төмен, елді мекендер арқылы өтетіндіктен қозғалыс жылдамдығы баяулайды. Сонымен қатар бұрылыстардың көптігі, жолдың тарлығы және қызмет көрсету инфрақұрылымының жеткіліксіздігі де жүргізушілер үшін қолайсыз. Соның салдарынан уақыт пен жанармай шығыны да артады.
Абонементті қосу жолдары немесе басқа да сұрақтар бойынша ақпаратты: kaztoll.kz сайтындағы Жеке кабинеттен және 1403 байланыс орталығы арқылы алуға болады.
Айша ҚАДЫР
