Қазақстан Республикасы Қарулы күштерінде әскери қызметшілердің кәсіби шеберлігін шыңдауға арналған жауынгерлік даярлықтың маңызды кезеңі – мамандық бойынша даярлық бастау алды. Оқу барлық әскери бөлімдерде ұйымдастырылып, жауынгерлердің лауазымдық міндеттеріне сәйкес практикалық дағдыларын жетілдіруге бағытталған, – деп хабарлайды 7-su.kz ақпараттық порталы.
Мамандық бойынша даярлық әскери міндеттерді сапалы атқарудың негізі болып қаланады. Осы кезеңде әскери қызметшілер өздерінің функционалдық міндеттерін тереңірек меңгеріп, штаттық қару-жарақ пен әскери техниканың материалдық бөлігін, сондай-ақ оларды пайдалану тәртібін үйренеді. Мерзімді қызметтегі жауынгерлер үшін бұл әскери мамандықты жүйелі түрде игерудің алғашқы сатысы болса, келісімшарт бойынша қызмет атқаратын кәсіби әскерилер үшін шеберліктерін шыңдауға зор мүмкіндік береді.
Ағымдағы оқу кезеңінде түрлі әскери мамандықтар бойынша 25 мыңнан астам әскери қызметші даярлықтан өтуде. Оқу процесінің тиімділігін арттыру мақсатында 2,5 мыңнан астам оқу тобы құрылып, әрбір қызметшіге жеке тәсілмен дайындық жүргізу шаралары қамтамасыз етілді. Сабақтарды мол тәжірибесі мен әдістемелік дайындығы бар офицерлер мен сержанттар қатарынан таңдалған нұсқаушылар өткізеді. Даярлықтың практикалық бағыты жауынгерлерге теориялық білімдерін бекітіп қана қоймай, қару-жарақ пен техниканы қолдану кезінде нақты іс-қимыл дағдыларын қалыптастыруға ықпал етеді.
Қазақстан Республикасы Қарулы күштері Бас штабы Жауынгерлік даярлық департаментінің аға офицері майор Нұрзат Оразбектің айтуынша, мамандық бойынша даярлық әскерлердің одан әрі жауынгерлік қабілетінің негізін қалайды. Дәл осы кезеңде әскери қызметші өз мамандығы бойынша міндеттерін сенімді орындауға қажетті білім мен практикалық машықты толық меңгереді. Әрбір маманды сапалы даярлау бөлімшелердің үйлесімді іс-қимылына, жауынгерлік машық деңгейіне және Қарулы күштердің алға қойылған міндеттерді орындауға дайындығына тікелей әсер етеді.
Даярлық курсы аяқталған соң, 10 тамыздан бастап барлық әскери бөлімдерде бақылау сабақтары ұйымдастырылады. Оның барысында әскери қызметшілер оқу бағдарламасын меңгеру деңгейін және жауынгерлік даярлықтың келесі кезеңдеріне толық дайындығын көрсетеді.
Ел қорғанысы – әрбір жауынгердің кәсіби даярлығы мен жауапкершілігіне тікелей байланысты. Жауынгерлік даярлық пен әскери мамандықты терең меңгеру – ұлттық қауіпсіздікті қамтамасыз етудің кепілі. Жүйелі оқу-жаттығулар арқылы Қарулы күштердің қуаты артып, әскери техниканы тиімді пайдалану көрсеткіштері жоғарылайды.
