Үкімет 2027 жылы инфляцияның ең жоғарғы шегі 9,5 пайыз болады деп болжап отыр. Бұл көрсеткіш елдің әлеуметтік-экономикалық дамуының жаңа жоспарында жоғарғы шек ретінде көрсетілген. Бұл туралы Үкімет отырысында премьер-министрдің орынбасары — ұлттық экономика министрі Серік Жұманғарин мәлімдеді, – деп хабарлайды 7-su.kz ақпараттық порталы.
«2027 жылы инфляция 7,5-9,5 пайыз деңгейінде болады деп айқындалды, кейін, 2028-2029 жылдары 6-8 пайызға дейін төмендейді», – деді ол.
Ұлттық банк төрағасы Тимур Сүлейменов Қазақстанда инфляция төмендеп келе жатқанын жеткізді. Оның айтуынша, былтыр қыркүйектегі 12,9 пайыздық ең жоғары көрсеткіштен кейін 10,2 пайызға дейін төмендеген. Төмендеу процесі он ай қатарынан жалғасып келеді.
Инфляция деген не?
Инфляция – тауарлар мен қызметтер бағасының жалпы деңгейінің тұрақты өсуі. Оның салдарынан уақыт өте келе белгілі бір ақша сомасына бұрынғыға қарағанда аз тауар немесе қызмет сатып алуға болады.
Мысалы, азық-түлік себетінің құны бүгін 10 мың теңге болса, бір жылдан кейін 11 мың теңгеге жетсе, баға 10%-ға өскенін білдіреді.
Инфляция бір ғана тауардың қымбаттауын емес, экономикадағы тауарлар мен қызметтер бағасының жалпы өсуін сипаттайды.
