Көпбалалы аналарға мемлекеттік жәрдемақы қалай тағайындалатынын білесіз бе? Бұл сауалға Халыққа қызмет көрсету орталығының мамандары жауап берді.
Көпбалалы отбасы атандыңыз ба? Онда, ең алдымен, көпбалалы отбасыларға берілетін жәрдемақыны рәсімдеуге асығыңыз. Аталмыш жәрдемақы тек ХҚО арқылы рәсімделеді. Ол үшін:
Тұрғылықты мекенжайыңызға қарасты ХҚО-ға кезекті алдын ала брондаңыз; тағайындалған уақыттан ХҚО-ға 20 минутқа ерте барыңыз; операторға төмендегі құжаттарды өткізу арқылы жәрдемақыға өтініш жазыңыз: жеке куәлік; балалардың құжаттары; банктік есепшот жөніндегі анықтама.
Ескерте кетейік, 18 жасқа толған балалары бар отбасыларға жәрдемақы, бала жоғарғы оқу орнының күндізгі бөлімінде оқып жатса және ол 23 жасқа толғанша оқуынан анықтама өткізсе ғана төленеді. Төлем мөлшері: 4 бала үшін — 44 531 тг; 5 бала үшін – 55 671 тг; 6 бала үшін – 66 810 тг; 7 немесе одан да көп бала үшін — 77 950 тг.
Қызмет көрсету уақыты құжат тапсырған күнді есепке алмағанда, 8 жұмыс күні болып есептеледі.
«ЖЕТІСУ-АҚПАРАТ»
Сурет — ғаламтордан
