Ақсу ауданы, Жансүгіров ауылының тұрғындары ерекше шаттыққа бөленді. Оған себеп те жоқ емес. Облыс әкімінің орынбасары Лаззат Тұрлашов пен аудан әкімі Әділбек Далбағаев былтыр отқа оранған 14 тұрғын үйдің иелерінің қуанышын бөлісті. Иә, тосын апаттан тосырқап қалған тұрғындардың бүгінгі бітімі бір бөлек. Расымен де тілсіз жаудан зардап шеккендер әкімдіктен көмек күткен болатын. Сол үміттері ақталып, пәтер кілтіне қол жеткізді.
Ауыл шетіндегі айрықша аймақ тұрғын үй салу үшін арнайы дайындалған. Жол құрылыстары толығымен түгесіліп, екіге айырылған беткейдің бір бетіне 2, бір бетіне 12 тұрғын үй қоныстанған. Жалпы саны 14 үй салынып біткен ауданның құрылыс жұмыстары осы жылдың басында басталған болатын. Міне, енді ел құлағына жетер елеулі жаңалыққа айналып, жайдарман күйде жұртшылық жүрегін тербетті. Қоршауынан бастап әр тасы мен түйіріне дейін қамтылған аймақ тұрғындар игілігіне тіпті жарап тұр. Жайдарман жаңалық жанын желпінткен жұртшылық аталмыш аймаққа ат басын бұрды. Біздің аңғарғанымыз, хан сарайындай сап түзеген сарайлар сарылып күткен сағыныштың жауабын бергендей. Иә, расымен де аталмыш аймаққа алғашқы болып табаны тиген Күлзипа Жәрдембекованың жүзінде шаттық ойнайды. Асыл ананың үш немересі мен екі баласы бар. Үйі отқа оранғанда сәл қапаланғанымен Үкімет тарапынан көмектің боларына кәміл сенген ана жүрегі жаңылмады. Облыс әкімі мен аудан басшысының айтарлықтай көмегіне арқа сүйеген жан өзі де үлкен таңданыста екендігін жеткізді. Бұл арманның қысқа мерзімде орындала қоюына күмән тудырғандар да болған екен.
Ақсу ауданы құрылыс бөлімінің басшысы Серікхан Жақыповтың сөзіне сүйенсек, былтыр желтоқсан айында басталған бұл жоба бір үйдің аумағы 68 м.кв-ты қамтып, отқа оранған үйлердің өтемін жапқан. Сондай-ақ, облыс әкімінің тапсырмасы бойынша тікелей қадағаланған тұрғын үй келісімшарт бойынша іске асқан. Келер жылы тағы 20 тұрғын үйдің құрылысын бастамақ. Оған дейін аталмыш аймақта жалдамалық 10 пәтердің іргесі қаланбақ. Бұл жоспар бойынша биыл жобалық-сметалық құжаттамасы бітсе 60 гектар жер теліміне 213 үйдің орнына су мен электр жүйесін тартып беру көзделуде. Жалпы аудан бойынша үй кезегінде тұрғандардың саны – 686 адам. Дегенмен де, аудандағы ауқымды істер арқасында бұл цифр күннен-күнге азайып келеді. Облыс әкімі де бұл маңды кейінгі кезде шағын аудан жасаймыз деген ниетте. Қазір бір мектептің орнын қалдырып, кейіннен балабақша да қарастырылмақ. Алдағы уақытта Жансүгіров ауылдық округінің оңтүстік шығысында орналасқан мекенге шағын аудандар түсіп, аталмыш қатарға 60 гектар жерге су мен электр жүйесі тартылады. Ауыл тұрғындары ең алдымен көгалдандыру, көгерту, жасыл желекке бөлеп, жастарға жол сілтеп, бағыт-бағдар беріп отырған Елбасымызға алғысын жолдап, оның Жолдауларын қолдап, оны орындап, тек сөз жүзінде емес, іске асырып жүрген облыс әкімі Амандық Ғаббасұлына, ауданның басшысы Әділбек Егеубекұлына алғыс айтуда. Қашанда таудың тасындай болған Ақсу азаматтары дәл осы сәтте де татулықпен тұғырдан көрінді.
Пәтер кілттерін табыстауға арнайы келген облыс әкімінің бірінші орынбасары Лаззат Тұрлашов бүгінгі таңда адамға бастысы баспана екенін айтып, бүгінгі игі іс соның нәтижесі екенін атап өтті. Жетісу өңірінің бас қаламызға, Астанамызға сыйлаған «Жетісу» саябағын да тілге тиек етті. Қысқа мерзімде салынған үйдің негізгі қуаты Елбасының саясаты екендігін ел жақсы біледі. Бұл арада құрыш қолды құрылысшылардың да төккен тері мен адал ісі айтарлықтай. Пәтер иелеріне ақ ниетін арнаған Лаззат Махатұлы «шаңырақтарыңыз әрқашан да биік, керегелеріңіз мықты, берік болсын» деген ақжарма тілегін арнады. «Осы үйлерде тек жақсы жаңалықтарға куә болып, бүлдіршіндердің күлкісін естиік», – деген аудан әкімі Әділбек Егеубекұлы қуанышты жаңалықтардың таусылмауын тіледі. Жиын қорытындысында болашақта Ақсу өңірінде қанша құрылыс нысандары салынатыны жоспарланып, қарапайым тұрғындарды қуанышқа бөлейтіні де айтылды. Сондай-ақ, игі шара шымылдығы Жансүгіров ауылдық округі ардагерлер кеңесінің төрағасы, Ақсу ауданының Құрметті азаматы, ардагер-ұстаз Сайлаубек Алдабергенов атамыздың батасымен жабылды.
Құралбек Сәбитов
