Бейбіт Әлібековтің «По домам» YouTube-жобасының кезекті шығарылымы бұл жолы қазақстандық кәсіпкер Тұрсын Алагөзов пен оның жары, продюсер Баян Мақсатқызының зәулім үйіне арналды, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
Алматы іргесіндегі таулы аймақта орналасқан вилланың аумағы 4 гектардан асады. Ал тұрғын үйдің жалпы көлемі 2 мың шаршы метрден жоғары. Үйдің ішкі әрлеуінде жылтыр мәрмәр, қымбат дизайнерлік жиһаздар қолданылған. Кең киім бөлмелеріндегі үлкен шкафтарда Louis Vuitton, Swarovski, Hermès (Birkin, Kelly және сирек кездесетін лимитті үлгілер) сынды әлемдік брендтердің өнімдері сақталған.
Үй ішінде жеке хауыз, заманауи жаттығу залы және үй жануарларына арналған арнайы бөлме қарастырылған. Ауладағы ерекше нысандардың бірі – сегіз қанатты сәнді киіз үй. Ұлттық нақышта безендірілген киіз үй қонақ қабылдауға толықтай лайықталған. Бұл нысан Баян Мақсатқызының өтінішімен бір ай ішінде дайындалған.
«Мұның бәрін әйелім үшін істедім», – деді Тұрсын Алагөзов.
Отбасы салауатты өмір салтын ұстанады. Үй ішінде кәсіби деңгейдегі фитнес орталығы мен кең бассейн бар. Бұл тұрғындарға кез келген уақытта жаттығу жасап, демалуға мүмкіндік береді.
Шығарылым соңында Бейбіт Әлібеков үй иелерінен көрермендер арасындағы ең үздік пікір иесіне қандай сый берілетінін сұраған. Тұрсын Алагөзов жеңімпазға 500 мың теңге беруге дайын екенін айтса, әйел адам жеңген жағдайда Баян Мақсатқызы өзінің бренд сөмкелерінің бірін сыйға тартатынын жеткізді.
Жарияланғаннан кейін алғашқы тәулікте бейнежазба шамамен 550 мың қаралым жинап, 13 мыңнан астам пікір жазылған. Желі қолданушылары жұптың бір-біріне деген сыйластығы мен қарым-қатынасына ерекше назар аударған.
Пікір қалдырушылардың бірі: «Ер жігіттің белгісі – түзде мырза, үйде құл. Қандай мықты азамат, жұмысында да, үйде де», – деп жазса, тағы бірі: «Шынымды айтсам, видеоға үйді көрем деп кіріп, адамдарды көру үшін қалдым. Қызғаныш емес, өзгелердің бақыты үшін шын қуанатын сирек жағдай», – деген ойын білдірген.
Сондай-ақ желі қолданушыларының арасында: «Осы шығарылымнан кейін түсінгенім – нағыз үй шаршы метрмен өлшенбейді, бастысы – ішіндегі адамдардың энергиясы. Баянда стиль мен күш бар, ал Тұрсында тереңдік пен жүрек бар», – деген пікірлер де кездеседі.
