Тіл – халық үшін ең үлкен құндылық, атадан балаға мирас болып келе жатқан баға жетпес байлық. Тек тіл арқылы халықтың рухани мұрасы ұрпақтан-ұрпаққа жалғасып, жетіп отырады.
«Адамға екі нәрсе тіректегі, бірі – тіл, бірі – ділің жүректегі» деп Жүсіп Баласағұн айтқандай, тіл қай ұлт, қай елде болсын құдіретті. Ол адамның бойына ана сүтімен дариды. Сондықтан да оны ана тілі деп құрмет тұтып, анамыздай ыстық, қадірлі санаймыз.
Әр тілдің өз ерекшелігі бар. Біздің қазақ тілі дарқан даламыздай шексіз, шетсіз, шұрайлы, қазақтың пейіліндей кең. Оның қадір-қасиетін түсінген жан сол қазынаны ұрпағына құнын түсірмей жеткізуі тиіс.
Қазақстан – көпұлтты мемлекет. Сондықтан осында тұратын қай ұлттың өкілі болмасын Қазақстанды қасиетті Отаным деп біліп, оның негізгі тірегі тіліне де құрметпен қарап, осы тілде сөйлеуі тиіс.
Әрбіріміз Қазақстан мемлекетінің азаматы екенімізді жан жүрегімізбен түйсінсек, тіл мәдениетін көтеріп, оның ішінде өзге тілдерге көлеңке түсірмей, олардың ұмыт қалмауына мүмкіндік жасап, өз тілімізді өркендетуге үлес қосуымыз керек.
Өйткені, тіл ұлттық сана-сезімді қалыптастырудың бір тәсілі. Жастарға патриоттық тәрбие берудің аса маңызды құралы. Әр халық өз тілі арқылы әлемді, дүниені, өмірдің құнды тағылымдарын таниды, елінің мәдениетін жасайды, келешек ұрпаққа түйген тұжырымдарын жеткізеді. Бір ұлттың тілінде сол ұлттың сыры, тарихы, мінезі айнадай көрініп тұрады. Сондықтан туған тілімізді құрметтеп, әрбір қазақтың бірінші кезекте өз ана тілін танып білуіне негіз қалауымыз қажет. Бұл орайда қазақ тілі пәнінің маңызы зор. Қазақ тілі мен әдебиеті арқылы халқымыздың асыл қасиетін, сан ғасырлық бай мұрасын жас ұрпақ бойына сіңіреміз. Осы орайда қазақ тілі пәнінің маңызын арттырып, ол арқылы нағыз елін, жерін сүйетін, ұлттық құндылықтардан сусындаған жас ұрпақты тәрбиелеуге тиіспіз. Осы орайда қазақ тілі пәнінің мұғаліміне қойылар талап та жоғары. Тіл маманы халқымыздың тарихы, шежіресі, ауыз әдебиетін терең білетін тұлға болу шарт. Шешендік пен шеберлік те қазақ тілі пәні мұғалімінің бойынан табылуы тиіс асыл қасиет.
Динара Нұрлыбекова,
Талдықорған сервис және технология колледжінің
қазақ тілі мен әдебиеті пәнінің мұғалімі
Сурет ғаламтолрдан алынды
