Өз басын қатерге тігіп, адам жанына араша түсу – екінің бірінің қолынан келмейтін іс. Тіпті бейбіт заманда да ерліктің білекте емес, жүректе екенін оқыс оқиғалар кезінде дәлелдеп жүрген жандар бар. Сондай азаматтың бірі – Мирас Дәуітов. Кейіпкеріміз өз өмірін қауіпке тігіп өрттен адамдарды алып шыққан полиция қызметкері.
Оқыс оқиға 7 мамырда Талдықорған қаласындағы 3-бөлімшеде орын алған. Мирас Дәуітов үй қызыл жалынға оранып жатқанын көре сала бірінші жеткен. Ол газ қызметкерімен бірге түтінге оранған үйге кіреді. Өз өмірінен өзгелердікін жоғары бағалайтын кейіпкер тілсіз жаудан төнген қауіпке қарамай 9 бен 13 жас аралығындағы үш баланы аман-есен оқиға орнынан алып шыққан. Бір қызығы, тәртіп сақшысы бұл әрекетін ерлік деп санамайды екен. Айтуынша, өңір тұрғындарының тыныштығы мен қауіпсіздігі бірінші орында.
– «Ел халқының алдында берген антым бар. Одан бөлек, құқық қорғау саласына қызмет етуге келген әр адам адалдық пен халыққа қамқорлықты міндетім деп түйсінуі тиіс. Өрт туралы ести сала оқиға орнына асықтым. Тілсіз жаудан ешкімнің зардап шекпеуін қаладым. Жалынға оранған үй ішінен балалардың дауысын естідік. Үйге тұра ұмтылғанда ішінде газ баллоны бар екенін сырттағылар айқайлап ескертті. Бірер секунд абдырап қалдық та жалынға қарсы ұмтылдық. Газ баллоны жарылады деген ой да болды. Бірақ, ешкім зардап шекпеуі тиіс, балаларды құтқаруым керек деген ниетпен тұра ұмтылдым. Қауіп аранынан 3 баланы аман алып шықтық. Оны ерлікке, батырлыққа балаудың қажеті жоқ. Мен басты міндетімді орындадым. Қазір жылдам қимылдайтын арнайы жасақ сапында қызметтемін», – дейді бейбіт күннің батыры.
Қазір тілсіз жау аранынан құтқарылған балалар дін аман. Бастысы, газ қызметкерлері, құқық қорғаушылар мен өрт сөндірушілердің қауіпті кездегі үйлесімді қарекеті нәтижесінде ешкім зардап шекпеді. Үй егесі қауіпті сәтте шапшаң қимылдап, балаларының өмірін аман алып қалған азаматтарға алғаусыз алғыс білдірді.
– Сол күні үйде едім. Өрттің қалай шыққанын өзіміз де ұқпадық. Тілсіз жау лаң салғанда әбден абдырап қалдым. Мұндайда нақты шешім шығару қиын ғой. Есім шығып, жүгіре беріппін. Алаулаған жалынға қарамай екі жігіт балаларымды аман алып шықты. Олардың полицей екенін кейін білдім. Осындай ержүрек азаматтарға елдің алғысы жаусын, – деді Исмайл Бакиев.
Тілдесу барысында Мирас Дәуітов осы ерлігі үшін марапат күтпейтінін, елдің алғысынан басқа құрметтің қажет емесін алға тартты. Қалай дегенмен қоғамымызда адалдық пен қамқорлық туын көтерген жандар құрметсіз қалмайды.
Дастанбек САДЫҚ
