Елімізде қатаң карантин жарияланғаннан бері балабақша жұмысы да тоқтағаны баршамызға мәлім. Жыл бойына емін-еркін келіп жүрген балақайлар үйінде болуға мәжбүр.
Оқу жылының басынан «Балдырған» бөбекжай-балабақшасының «Жұлдызша» тобы балабақша қабырғасында өздерін дамыту мақсатында «Тіл тірегіміз, соғып тұрған жүрегіміз», «Тәуелсіз елім – Қазақстаным» атты ертеңгіліктер өткізді. Сонымен қатар, «Қош келдің, Жаңа жыл!», «Аяулы аналар» атты тәрбиелік мәні зор ашық оқу қызметі ұйымдастырылды.
Біздің «Жұлдызша» тобының қыздары «Ұлы Дала ұрпағы» республикалық байқауында балабақшалар арасында балалар шығармашылығы бойынша хореография жанрынан 1-орын дипломымен марапатталды. Міне, осындай жетістікке жете тұрып, тобымыздағы балалармен қоштасу ұйымдастыруымыз міндетті деп санадық.
Еліміздің басына төнген індетті ескере отырып, балабақшамен қоштасуды онлайн түрінде өткіздік. «Жұлдызша» тобымыздың балалары өз еркімен қоштасу кешіне деген өлеңдері мен ізгі тілектерін жолдады. Әр бала жаттаған тақпағын, өлеңін, ақ тілегін бейнеге жазып, бізге жіберді. Ата-аналар қауымы да балабақша тәрбиешілеріне деген жылы лебізін білдірді. Қоштасу онлайн өтсе де балалардың балабақшаға деген ізгі тілектерін көру біз үшін үлкен мереке болды.
«Жұлдызша» тобының балаларының жаңа қадамына сәт сапар тілейміз.
Алмагүл КОГУЛОВА,
«Балдырған» бөбекжай-
балабақшасының тәрбиешісі
Сарыөзек ауылы,
Кербұлақ ауданы
