Қасым-Жомарт ТОҚАЕВ Ұлттық құрылтайда: «Жуырда Талдықорғанға бардым. Ондағы қазақ мектебі қарапайым болса да тартымды. Осындай мектептерді барлық жерде салу керек. Өйткені «Жайлы мектептер» айтарлықтай қымбат, оны әр облысқа сала берудің де қажеті шамалы» деген еді.
Осыған орай Ынтымақ ауылындағы №30 мектептің атқарылып жатқан іс-шараларымен таныстыру жұмыстары жүргізілді. Атап айтқанда, «Жасыл мектеп» жобасы, ұлттық құндылықтарды насихаттау мақсатындағы біртұтас тәрбие жобасы, домбыра ансамблі мен тоғызқұмалақ үйірмелері, сондай-ақ пән олимпиадалары мен ғылыми жобалары оқушылардың жан-жақты дамуына үлес қосуда.
Оқушылар өздерінің ғылыми ізденістері мен шығармашылық жобаларын таныстырып, білімдерін тереңдетуге мүмкіндік алуда. Бұл жобалар оқушылардың сыни ойлау қабілеттерін дамытып, ғылыми зерттеулерге деген қызығушылығын арттыруға септігін тигізуде.
«Жайлы мектеп» ұлттық жобасының аясында салынған бұл оқу ордасының артықшылығы – біліктілігі жоғары, жаңашыл, өз ісінің мамандары ұстаздық қызмет атқаруын талап етеді. Қатаң тәртіп пен жіті сараптаудан өтіп, білім көрсеткішін салмақтау бойынша тағылымдама тапсырады. Сыртқы бағалау деп аталатын жүйе бойынша да рейтинг сарапқа салынады. Сонымен қатар, мектеп оқушыларына да тиімді. Типтік жағынан кең, ауқымды. Спорт залы да үлкен. Ерекше балаларға арналған пандус, лифт және арнайы дәретхана бөлмесі жасақталған. Заманауи бейнебақылау, кіріп-шығуды қадағалау жүйелерімен қамтамасыз етілген. Ғимараттары өрт қауіпсіздігі, санитарлық және басқа да талаптарға толық сай. Сондай-ақ, техникалық құралдарды енгізу арқылы қауіпсіздік шараларын арттыру, ерекше білім беруді қажет ететін балалар үшін кедергісіз орта қалыптастыру, мектепті заманауи пәндік кабинеттермен жабдықтау талап етіледі.
Мектеп директорының оқу ісі жөніндегі орынбасары Гүлбану Несипжанова:
– «Мектебімізде 1200 білім алушы тәрбиеленуде. Жоғары санатты және магистр ғылыми дәрежесі бар ұстаздар оқушылардың білімге деген қызығушылығын арттыру мақсатында үйірмелер, жобалар ұйымдастырады. Мектеп ауласында жаратылыстану пәндері бойынша зерттеу жұмыстары жүргізілуде», – деп оқу орнының артықшылығына тоқталып кетті.
«Жайлы мектептің» жүзеге асуы білім беру саласындағы өзгерістердің бастамасы. Қазіргі білім беру жүйесінде маңызды қадам. Бұл бастама бірнеше жағынан дұрыс әрі пайдалы. Олардың бірі – оқушылардың білім деңгейін, сапасы мен жайлылығын арттыру. «Жайлы мектептер» оқушылардың денсаулығына да әсер етіп, оқу процесіне деген қызығушылығын арттырады.
Қорытындылай келе «жайлы мектеп» салу – болашақ ұрпақтың білім деңгейін арттыруға бағытталған дұрыс және маңызды қадам.
Санжар СҰЛТАНҒАЗЫ
