2025 жылдың басынан бері Кәмелетке толмағандар істері және олардың құқықтарын қорғау жөніндегі комиссиялар 4 мыңға жуық отырыс өткізіп, 7 мыңнан астам істі қарады, деп хабарлайды 7-su.kz ақпарттық порталы Қазақстан Республикасының Оқу-ағарту министрлігіне сілтеме жасап.
Оның ішінде мыңнан астам іс өмірлік қиын жағдайға тап болған отбасыларға қатысты. Мұндай отбасыларға материалдық, психологиялық, құқықтық және медициналық көмек көрсетіліп, жұмыспен қамту, емделу, балалардың оқуына және демалысын ұйымдастыру мәселелерінде қолдау көрсетілді.
Қазіргі таңда елімізде 271 комиссия балалардың құқықтарын қорғау, құқықбұзушылықтың алдын алу және отбасыларды қолдау бағытында жұмыс істейді. Олар жоспарлы мәселелермен қатар, қоғамда резонанс тудырған және шұғыл шешімді қажет ететін істерді де қарайды.
«Кәмелетке толмағандар істері жөніндегі комиссиялар – балалардың құқықтарын қорғаудың басты тетігі. Біз ведомствоаралық өзара іс-қимылды күшейтіп, буллингтің, кибербуллингтің және суицидтік мінез-құлықтың алдын алу бағытында жаңа тәсілдер енгізудеміз», – деді ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.
Құқық қорғау органдарымен бірлескен рейдтер нәтижесінде балаларды тәрбиелеу жөніндегі міндеттерін орындамаған 21,8 мыңнан астам ата-ана, түнгі уақытта кәмелетке толмағандардың үйден тыс жүруіне жол берген 107 мыңнан астам заңды өкіл және ойын-сауық орындарына балаларды кіргізген 2 мыңға жуық кәсіпкер әкімшілік жауапкершілікке тартылған.
Қазір комиссиялардың жұмысын жетілдіруге бағытталған жаңа ережелер дайындалуда. Құжатта буллинг пен кибербуллингтің алдын алу, зерттеу жүргізу және өңірлерге әдістемелік қолдау көрсету бағытындағы өкілеттіктерді кеңейту көзделген. Бұл шаралар жергілікті деңгейдегі жауапкершілікті күшейтіп, балалардың қауіпсіздігін қамтамасыз етуге мүмкіндік береді.
