Жансақтау бөлімінде жатқан науқастарға қатысты мүгедектік рәсімдеу тәртібі жеңілдетілуі мүмкін. Қазақстан Республикасы Еңбек және халықты әлеуметтік қорғау министрлігі осы бағытта жаңа түзетулер ұсынып, оларды қоғамдық талқылауға шығарды. Құжат жобасы қазіргі уақытта «Ашық НҚА» порталында жарияланған, – деп хабарлайды 7-su.kz ақпараттық порталы.
Ұсынылып отырған өзгерістердің негізгі мақсаты – өмірлік қиын жағдайға тап болған азаматтарға көрсетілетін әлеуметтік қолдауды қолжетімді әрі жедел ету. Әсіресе, өз бетінше әрекет етуге қабілетсіз комадағы науқастар үшін құжат рәсімдеу процесі бұрын айтарлықтай күрделі болған. Көп жағдайда бұл уақыттың созылуына және тиісті көмектің кешіктірілуіне әкелетін.
Жаңа тәртіпке сәйкес, енді медициналық-әлеуметтік сараптамаға өтінішті науқастың өзі емес, оның жақын туыстары немесе жұбайы бере алады.
Министрлік әзірлеген түзетулер медициналық-әлеуметтік сараптама жүргізу және мемлекеттік төлемдерді тағайындау қағидаларына енгізілмек. Соның нәтижесінде мүгедектік мәртебесін белгілеу үдерісі жеделдеп, әлеуметтік төлемдер мен жәрдемақыларды уақытылы рәсімдеуге мүмкіндік туады.
Сондай-ақ, өзгерістер әлеуметтік көмекті алу процесін ашық әрі түсінікті етуге бағытталған. Бұл бастама, мамандардың пікірінше, ең осал санаттағы азаматтардың құқықтарын қорғауды күшейтіп, жалпы әлеуметтік қолдау жүйесінің тиімділігін арттыруға ықпал етеді.
Қоғамдық талқылауға ұсынылған жоба әлі де пысықталуы мүмкін. Дегенмен, ұсынылып отырған өзгерістер бюрократиялық рәсімдерді қысқартып, нақты көмекке мұқтаж жандарға қолдау көрсетудің жаңа тетіктерін қалыптастыруға жол ашпақ.
