«Жұмыспен қамтудың Жол картасы» бағдарламасы аясында Қапшағайда біраз әлеуметтік мәселе оң шешімін тауып жатыр. Сонымен бірге, Қапшағайда жылдың төрт мезгілінде де ыстық су қолжетімді болады. Бұл туралы Қапшағай қаласы әкімдігінің баспасөз қызметі хабарлады.
Шаһарда мектеп, ойын алаңдары, жол жөндеуден өтуде. Мәселен, аталған бағдарлама шеңберінде қаладағы Алтынсарин атындағы мектеп жаңартылуда. Білім ошағы 1965 жылы салынған. Содан бері еш жөндеу көрмеген еді. Нысан 600 орынға лайықталған. Қазір 700 оқушы білім алып жатыр. Пандемия кезеңінде кезекші сыныптар жасақталып, 155 бала әдеттегі форматта білім алуда. Сондай-ақ, Жол картасымен қала көшелеріндегі су құбырлары да жаңартылуда. Алматы-Қонаев көшелерінің аралығында құрылыс басталған.
Жоспар бойынша жыл соңына дейін қапшағайлықтардың үйлеріне су жеткізіліп тіршілік нәрінен тарықпайтын болады. Жаз кезінде қаладағы Арна-1, Арна-2 сынды бірнеше шағынаудандарда су тапшылығы байқалатын. Осы мәселені шешу мақсатында қосымша қаржы тартылуда.
Шаһардағы «Шығыс» шағынауданында да мемлекеттік бағдарлама негізінде күрделі жөндеу өтіп жатыр. Мұндағы құрылысқа 22 адам тартылған, оның 12-сі жұмыспен қамту орталығы арқылы келген.
«Қала тұрғындары келер жылы төрт мезгілде де ыстық суға қол жеткізеді. Қазандықтың көгілдір отынға қосылуы жергілікті халық үшін осы мүмкіндікті сыйламақ. Қазандықтың жаңартылуына 680 млн.теңге бөлінді. Бұл, біріншіден, шығынды азайтса, екіншіден, экологияға зияны аз. Қазір қазақндықты газға қосу жұмысы аяқталуға жақын. Қарашада іске қосамыз», — деді Қапшағай қаласының әкімі.
Қапшағайдағы ойын алаңдары мен аулалар да назардан тыс қалмаған. Тиісінше, нысандар ретке келтірілген.
«ЖЕТІСУ-АҚПАРАТ»
Сурет — ғаламтордан
