2025 жылғы 1 маусымнан бастап Қазақстанда балаларға арналған спорт, өнер және қосымша білім беру бағыттары бойынша бірыңғай ваучер жүйесінің пилоттық жобасы іске қосылады.
Бұл туралы 7-su.kz ақпараттық поратлы ҚР Туризм және спорт министрлігінің дерегіне сүйеніп хабарлайды.
Мемлекет жыл сайын балалардың шығармашылық үйірмелерге, спорттық секцияларға және қосымша білім беру бағдарламаларына қатысуын қаржыландырып келеді. Алайда тексерістер нәтижесінде көптеген заңбұзушылықтар анықталған. Жаңа жүйе осындай кемшіліктердің алдын алып, балалар үшін қауіпсіз әрі сапалы орта қалыптастыруға бағытталған.
Пилоттық жоба Астана, Шымкент, Қарағанды, Қызылорда, Атырау және Ақтөбе қалаларында жүзеге асырылады. Бұл бастама мемлекеттік және жекеменшік ұйымдарды бірыңғай цифрлық платформаға біріктіріп, ваучерлерді тікелей балаларға ұсынуға мүмкіндік береді. Енді бала спорттан өнерге немесе білім беру бағдарламасына кедергісіз ауыса алады.
Ваучердің екі түрі қарастырылған:
-
Нысаналы ваучер – мемлекеттік ұйымдарға арналған, кезексіз беріледі.
-
Әмбебап ваучер – eGov.kz порталы арқылы ата-аналар жекеменшік ұйымды таңдай алады. Мұнда кезек баланың жасы мен әлеуметтік мәртебесіне байланысты құрылады.
Жүйенің артықшылықтары:
-
Қауіпсіз инфрақұрылым мен сапалы білім беру талап етіледі.
-
Қаражаттың мақсатты және ашық жұмсалуын қамтамасыз етеді.
-
Қатысушылар күн сайын цифрлық түрде тіркеледі.
-
Сыбайлас жемқорлық пен алаяқтық қаупін азайтады.
Жобаны төрт министрлік бірлесіп жүзеге асырады: Мәдениет және ақпарат министрлігі, Туризм және спорт министрлігі, Оқу-ағарту министрлігі және Цифрлық даму министрлігі.
