Облыстық білім басқармасына қарасты «Жетісу дарыны» орталығының ұйымдастыруымен республикалық жалпы пәндер олимпиадасының облыстық кезеңі 13 пән бойынша өтті. Білім сайысына аудан, қала мектептері мен облыстық білім беру ұйымдарынан барлығы 825 оқушы қатысты.
Өребәйгеге әл-Фараби атындағы Қазақ Ұлттық, Абай атындағы Алматы мемлекеттік, Сүлеймен Демирел атындағы университеттерінің және Санкт-Петербургтың гуманитарлық кәсіподақтар университетінің белді оқытушы-профессорлары қазылық етті.
Олимпиаданың жабылу салтанатында облыстық білім басқармасы басшысының орынбасары Майгүл Омарова екі күндік сайысты қорытындылап, оқушылардың дарыны мен талпынысына жоғары баға берді. Бүгінде белгілі бір жетістікке жеткен жеткіншектердің болашақта бұдан да биік шыңдарды бағындыруына тілек білдірді. Олимпиадаға қатысушы оқушыларды құттықтап, шәкірттер білімін бағалаған ғалымдарға алғысын жеткізді.
Өребәйге қорытындысында әр пән бойынша 44 оқушы бірінші орын тұғырынан көрініп, алтын медаль иеленді. 103 оқушы екінші орынды қанжығалап, күміс медаль иегері атанды. Ал 197 оқушы үшінші орынға лайық деп танылып, қола медальді меншіктеді.
Олимпиадада ерекше көзге түскен Панфилов ауданы, Б. Назым атындағы орта мектебінің 11-сынып оқушысы Шахноза Шавдунова «Шынайылығы мен шығармашылығы үшін» номинациясымен марапатталды. Сонымен қатар, сандық рейтингке сәйкес «Үздік олимпиадалық команда» дипломы А. Мәлкеев атындағы Есік мамандандырылған дарынды балаларға арналған «БІЛІМ-ИННОВАЦИЯ» лицей-интернатына берілді.
Олимпиаданың қорытындысы бойынша Астана халықаралық университетінің ректоры С. Исалиевтің қолдауымен биыл мектеп бітіруші 5 жеңімпаз түлекке грант тағайындалды. Ал олимпиаданың 72 жеңімпазы облысымыздың намысын республика деңгейінде қорғайтын болады.
Алма ЕСЕНБАЕВА
