«Нұрлы жер» бағдарламасы бойынша Балпық би кентінің «Береке» шағынауданында көпқабатты тұрғын үй пайдалануға берілді. Пәтер кілтін қуаныш иелеріне аудан әкімі Алмас Әділ табыс етті.
Салтанатты шараға арнайы келіп, аудан тұрғындарының қуанышымен бөліскен Алмас Қабдолұлы жаңа пәтер иелерін құттықтады.
– Халыққа барынша жағдай жасап, баспана мәселесінің оңтайлы шешілуін қадағалау — біздің басты міндетіміз. Осыған байланысты Елбасының «Нұрлы жер» бағдарламасы ойдағыдай жүзеге асуда. Өткен айда 50 пәтердің кілті тапсырылса, бүгінде ауданымыздың 20 тұрғыны өз баспанасына ие болды. Жаңа пәтер жарықпен, сумен, жылумен қамтамасыз етілген. Халықтың баспаналы болуы бәріміздің жетістігіміз. Мемлекет қамқорлығын сезініп, пәтерге ие болған баршаңызды қуаныштарыңызбен шын жүректен құттықтаймын. Шаңырақтарыңыздан шаттық, береке кетпесін, – деді ол.
– «Нұрлы жер» бағдарламасының нәтижесінде пәтер алатынымызды білгенде бала-шағамызбен қатты қуандық. Өйткені, біз пәтер тауқыметін бес жыл тарттық. Әркімнің босағасын жағалап, талай табалдырықты тоздырдық. «Жыртық үйдің Құдайы бар» демекші, балаларымның несібесіне берілген жеке баспанамыздың барына әлі де сене алмай тұрмыз. Көпбалалы аналарға осындай мүмкіндік берген ел ағаларына алғыс айтамын, – деді алты баланың анасы Гүлнар Хасенова.
Мүгедектігі бойынша екі бөлмелі пәтер алған аудандық ветеринария бөлімінің қызметкері Ұлпан Биадилова жарық, жылы әрі кең баспанада отбасымен бірге өмір сүретіндігін айтып, Президентке, аудан басшылығына аналық жүрегімен ризашылығын білдірді.
Айта кетейік, 20 пәтерді көпбалалы, зейнеткер, жалғызбасты аналар, ата-анасының қамқорлығынсыз қалған балалар, мүгедек бала асыраушы отбасы, «Ардақты ана» жеңімпаздары, «Алтын алқа» иегерлері және І, ІІ топ мүгедектері иеленді.
Аудан әкімінің орынбасары Дәулет Халеловтың айтуынша, «Көксу ауданының құрылыс бөлімі» мемлекеттік мекемесі «Нұрлы жер» бағдарламасы арқылы өткен жылы екінші деңгейдегі 41 тұрғын үйді сатып алған. Сонымен қатар, жағдайы төмен отбасыларға ауданның жомарт азаматтары 7 баспана сыйға тартқан. Алдағы уақытта 20, 60 пәтерлі тұрғын үй құрылысы басталмақ. Аудан бойынша 874 азамат баспана алуға тіркелген.
Еңлік КЕНЕБАЙ
Көксу адуаны
Алматы облысы
