Талдықорған қаласындағы дүкендерде қолжетімді бағамен әлеуметтік маңызы бар тауарлар сатылатын «әлеуметтік сөрелер» орнатыла бастады. «Жетісу» әлеуметтік-кәсіпкерлік корпорациясы» өңірлік даму институты» акционерлік қоғамының мәліметінше, қазіргі таңда аталған қала және Өтенай ауылы дүкендерімен төрт агенттік келісім жасалды.
Аталған төрт дүкенде облыстың тұрақтандыру қорының өнімдері белгіленген баға бойынша сатылуда. Олардың қатарында құмшекер, күнбағыс майы, күріш, кеспе, картоп және пияз бар. Отандық өнімдер жоғары сапалылығымен және қолжетімді бағамен ерекшеленеді. Бұл азық-түліктерді дүкендерден «Әлеуметтік маңызды тауарлар» атты арнайы бұрыштан табуға болады.
– Әлеуметтік сөрелердің ашылуы – әлеуметтік маңызы бар азық-түліктер бағасын ұстап тұру шараларының бірі. Бұл тауарлар тұрақтандыру қорының қоймалары және апта сайын Талдықорған қаласының коммуналдық базары арқылы сатылады. Жалпы облыстың тұрақтандыру қоры 2015 жылдан бастап 10 991,2 тонна азық-түлік тауарларын сатып алды, оның 7283,6 мың тоннасы өткізілді. Қазіргі кезде қорда 3707,6 тонна өнім қалды, – дейді «Жетісу» ӘКК» ӨДИ» АҚ басқарма төрағасының орынбасары Альмира Ыбрайымова.
Сондай-ақ, «Жетісу» ӘКК облыстың 52 наубайханасымен бірінші сұрыпты бидай ұнын жеткізу жөнінде агенттік келісім жасады. Қазіргі кезде наубайханаларға 3 мың тоннадан аса ұн жөнелтілді. Наубайханаларға ұнды жеткізу өткен жылдың қарашасында басталған болатын. Биылдың мамырына дейін жалғасады деп жоспарланып отыр. Кәсіпкерлерге ұн бір келі үшін 90 теңге бағамен берілді. Соның арқасында нанның бағасы 85 теңгеден аспайды. ӘКК әлеуметтік бағдарланған дүкендер желісін кеңейту жоспарланып отырғаны да аталып өтті.
– Біз бірнеше жыл бойы сауда саласында кәсіпкерлікпен айналысып келеміз. Сондықтан тұрғындар үшін азық-түлік бағасының қолжетімді болуының маңыздылығын жақсы түсінеміз. Жақында «Жетісу» ӘКК-мен агенттік келісім жасасып, дүкенімізде әлеуметтік маңызы бар тауарларды сатуды бастадық. Өнімдердің бағасы сатып алушылар үшін қолайлы, – деп атап өтті «Талмурзин» ЖК директоры Ерлан Талмурзин.
Дүкендердің мекенжайы: Талдықорған қаласы, Пушкин көшесі, 239 «А», «Санжар», Өтенай ауылы, Бейбітшілік көшесі 2/1, «Айзере», Абылай хан көшесі, 113, «Әлеуметтік дүкен», Гаухар ана көшесі, 110/112, «Дильназ» дүкендері.
Айгүл БАЙБОСЫНОВА
