Елбасының округ әкімдерінің халық алдында есеп беруі жөніндегі Жарлығына сәйкес Талды ауылдық округінің әкімі Мұрат Сейсенбеков ауылдастары алдындағы есебін бастады.
Тұрғындармен өткен кездесуде ауыл әкімі күн тәртібіндегі мәселе бойынша өткен жылы жүзеге асырылған жұмыстарды сала-сала бойынша талдап, тарқатып айтты. Ауылшаруашылығындағы жетістіктер мен егін, мал шаруашылығын дамыту, Өсек өзенін бойлай орналасқан Еңбекші, Лесновка және Жерұйық ауылдарының тұрғындары арасында шағын және орта бизнестің өрістеуіне жағдай жасау мәселелеріне тоқталып, бұл бағытта жүзеге аса бастаған бірқатар істі атап айтты.
– «Оразбаев» ЖШҚ 5 жаңа трактор, 3 жүгері оратын комбайн, тағы басқа да техника сатып алып, жалпы 87 миллион теңге инвестиция тартқан. «Тілеужан» ЖШҚ 10 миллион теңгеге асыл тұқымды қой, кәсіпкер Нұрдәулет Наймантаев 67 миллион теңгеден астам қаржыға асыл тұқымды ірі қара сатып алды. Лесновка ауылында 100 бас ірі қара арнайы жасалған қорада бордақылануда. Жер- ұйық ауылының іргесіндегі кірпіш зауыты инвестордың күшімен қайта жөндеуден өткізіліп, өз жұмысын бастайды, – деді Мұрат Сейсенбеков.
Өткен жылы Лесновка ауылындағы Пашенко көшесін жарықтандыруға, 32 жыл бұрын салынып, тозығы жеткен Жерұйық ауылындағы орта мектеп пен мүлкі тоналып, қаңырап қалған Мәдениет үйін күрделі жөндеуден өткізуге және орталық көшені асфальттауға сметалық жоба жасалды. Лесновка ауылында ауызсу мәселесі шешілді.
Жиынға қатысқандар ауыл әкімінің есебін зейін қойып тыңдап, жұмысына оң баға берді.
Мырзағали НҰРСЕЙІТ
Панфилов ауданы
