Талдықорған қаласының кітапханалар жүйесі облыстық деңгейде жоғары бағаланып, айтулы жетістікке қол жеткізді, – деп хабарлайды 7-su.kz ақпараттық порталы.
Жетісу облысының мәдениет, архивтер және құжаттама басқармасы ұйымдастырған 2025 жылғы облыстық рейтинг қорытындысы бойынша «В. Маяковский атындағы Талдықорған қаласының орталықтандырылған кітапханалар жүйесі» КММ «Жылдың үздік кітапханасы» номинациясын иеленді. Аталған марапат жүйелі жоспарлаудың, кәсіби ұйымдастыру жұмыстары мен заманауи жаңашылдықтың нақты жемісін көрсетеді.
Қалада 9 кітапхана халыққа тұрақты қызмет көрсетіп келеді. Кітапхана ісін жаңғырту мақсатында кітап қоры толықтай «Web-РАБИС» автоматтандырылған бағдарламасына енгізілді.
Технологиялық жаңалық оқырмандарға қызмет көрсету сапасын жаңа деңгейге көтеріп, ақпаратқа қолжетімділікті жеңілдетті. Жыл басынан бері кітапханалар 8 түрлі байқауға қатысып, өз бетінше 2 ірі сайыс ұйымдастырды. Әдеби кештер, кітап көрмелері мен танымдық кездесулер оқырмандардың қызығушылығын арттырып, рухани орталықтардың жұмысын жандандыра түсті. Аймақтың бас қаласындағы кітапханалардың жетістігі атқарылған ауқымды жұмыстың лайықты бағасы іспетті.
