«Таза Қазақстан» акциясы аясында «Ізгілік жолындағы игі іс» атты әлеуметтік-маңызы бар шара ұйымдастырылды.
Еріктілер Талдықорған қаласының тұрғыны, Екінші дүниежүзілік соғыстың ардагері, ұлағатты ұстаз Ысқақ Құсайыновтың шаңырағына барып, құрмет көрсетті. Алдымен ардагердің ел мен жер үшін сіңірген ерен еңбегіне алғыс білдіріп, естелік сыйлық табыс етті. Домбырамен күй шертіп, көңілін көтерді. Ақсақал ұл-қыздарға ақ бата берді. Сонымен қатар, еріктілер қарияның ауласын тазалап, үйдің айналасын ретке келтірді.
Аталған акцияның негізгі мақсаты – соғыс ардагерін ардақтап, жастардың бойына отансүйгіштік сезім сіңіру, үлкенге құрмет көрсетудің өміршең өнеге екенін ұғындыру. Қоғамдағы мейірім мен ізгілікті нығайту.
Айта кетейік, 1924 жылы Көлбай ауылында дүниеге келген Ысқақ Құсайынов 102 жаста. 18 жасында өз еркімен соғысқа аттанып, Украин майданында және Амур флотының зенит дивизиясында жауға қарсы шайқасты. Атқыштар дивизиясында зенитші-пулеметші болып, Еуропа елдерін фашист басқыншыларынан азат еткен батырлардың бірі. 1943-1945 жылдары Тынық мұхитына ауысып, кейін кеңес-жапон соғысына қатысқан.
Соғыстан кейін Лепсі педагогикалық училищесін тамамдап, қырық жылға жуық ұстаздық қызмет атқарды. Ол ІІ дәрежелі Отан соғысы орденімен, Еңбек Қызыл Ту ордені, «Жуков» медалімен марапатталған. Халық ағарту ісінің озық қызметкері, Алакөл ауданының Құрметті азаматы.
– Мұндай кездесулер жас- тар үшін үлкен тағылым мектебі. Біз ардагерлерге құрмет көрсетіп қана қоймай, олардың өмір жолы арқылы жас буынның бойына патриоттық рух пен адамгершілік құндылықтарды сіңіруді көздейміз. «Ізгілік жолындағы игі іс» акциясы алдағы уақытта да жалғасын тауып, қоғамда мейірім мен жанашырлықты арттыруға бағыттала береді, – деді еріктілерге жетекшілік еткен «Жетісу жастары» КММ-нің ұйымдастыру және үйлестіру бөлімінің жетекшісі Әділет Алмекеев.
Гүлжан ТҰРСЫН
