Талдықорған қаласында «Тіл саясатын іске асырудағы инновациялар: ізденістер мен шешімдер» атты республикалық семинар өтті. Онда тіл саясатына қатысты жаңа жобалар мен әдістемелер таныстырылып, мемлекеттік тілді оқытуда заманауи тәсілдерді қолданудың маңыздылығы айтылды.
Семинар Тіл сарайында басталып, қатысушылар тіл мұрасымен танысты. Облыстық Тіл оқу-әдістемелік орталығының оқытушысы Маржан Әділбек ұсынған «Сіз білесіз бе?» және «Сөзтүзер» жобалары, сондай-ақ, интерактивті тіл үйрету платформалары көпшіліктің қызығушылығын тудырды.
Салтанат сарайындағы ресми бөлімде Жетісу облысы әкімінің орынбасары Диас Есдәулетов пен ҚР Ғылым және жоғары білім министрлігі Тіл саясаты комитетінің төрағасы Ербол Тлешов тіл реформасының бағыттарын баяндады. Университет өкілдері мен жас ғалымдар да өз ұсыныстарын білдірді. Атап айтқанда, математикалық терминдерді қазақшалау жобасы таныстырылды.
Неміс ұлтының өкілі, қазақ тілінің жанашыры Инга Гросстың сөз сөйлеуі семинардың әсерлі сәттерінің бірі болды. Ол мемлекеттік тілді сақтаудың маңызын өлең жолдары арқылы жеткізді.
Панельдік сессиялар мен шеберлік сағаттарда тіл саясаты, сөйлеу мәдениеті, конфликтогенсіз коммуникация, интерактивті оқыту тәсілдері кеңінен талқыланды. Қатысушылар тәжірибе алмасып, жаңа идеялармен бөлісті.
Семинар соңында тіл жанашырларына Алғыс хат табысталып, жиын қорытындысы ретінде қазақ тіліне деген құрметтің артуы мен ұлттық рухтың жаңғыруы атап өтілді.
Санжар Сұлтанғазы
