Жетісу облысының аумағында «Дарынды балаларға – талантты ұстаз» республикалық педагогикалық олимпиадасының облыстық кезеңі мәресіне жетті, – деп хабарлайды 7-su.kz ақпараттық порталы.
Білім додасы өңірдегі жас мамандардың кәсіби біліктілігін шыңдап, заманауи ұстаздардың шығармашылық әлеуетін танытуға бағытталған. Қатысушылар тек жарысып қана қоймай, өзара тәжірибе алмасып, жаңашыл оқыту әдістерін талқылады. Олимпиаданың негізгі мүддесі – педагог мамандығының мәртебесін биіктету, жас мұғалімдердің инновациялық ойлау қабілетін дамыту және олардың белсенді кәсіби ұстанымын нығайту.
Байқау барысында ұстаздар заманауи технологияларды сабаққа енгізу, авторлық әдістемелерді қолдану және практикалық мәселелерді тиімді шешу бойынша өз шеберліктерін ортаға салды. Мұндай шаралар білім беру жүйесіндегі түйткілдерді шешудің жолы ретінде қарастырылады. Жаңа буын мұғалімдері тек теориямен шектелмей, баланың қабілетін ашуға арналған нақты шешімдерді ұсына білді.
Сайыс қорытындысы бойынша ең жоғары ұпай жинаған 10 педагог республикалық кезеңде бақ сынауға жолдама алды. Жеңімпаздар енді наурыз айының 9-11 күндері аралығында Алматы қаласында өтетін шешуші кезеңде Жетісу өңірінің намысын қорғайтын болады.
«Бұл олимпиада – тек жарыс емес, кәсіби өсу алаңы. Әр тапсырма бізді жаңа ізденіске жетелейді. Өз тәжірибемді көрсетіп қана қоймай, әріптестерімнің тың идеяларынан шабыт алдым. Мұндай алаңдар мұғалімнің дамуына үлкен серпін береді», – деді облыстық әдістемелік орталығының әдіскері Меруерт Нұрғалиева.
Айта кетерлігі, облыстық білім басқармасы мен әдістемелік орталықтар жас мамандарды қолдауды тұрақты түрде жүзеге асырып келеді. Олимпиада нәтижесі көрсеткендей, қазіргі жас ұстаздар цифрлық технологияларды меңгерген және бала психологиясына терең бойлай алатын мамандар екенін дәлелдеді.
