Қазақстанда жеке куәлікті онлайн рәсімдеуге мүмкіндік беретін жаңа қызмет түрі қолжетімді болды. Бұл — Ішкі істер министрлігі мен Цифрлық даму, инновациялар және аэроғарыш өнеркәсібі министрлігінің бастамасымен жүзеге асырылып жатқан пилоттық жоба.
Жаңа жүйе eGov электронды үкімет порталы мен eGov Mobile қосымшасы арқылы жүзеге асады және мемлекеттік қызмет көрсетудің тиімділігін арттыруға бағытталған.
Қызметті кімдер пайдалана алады?
Жеке куәлікті онлайн ауыстыру мүмкіндігі келесі жағдайда қолжетімді:
-
Құжаттың жарамдылық мерзімі аяқталуына 30 күн немесе одан аз уақыт қалса;
-
Жарамдылық мерзімі 10 күннен аспайтын уақыт бұрын аяқталған болса.
Онлайн рәсімдеу тәртібі:
-
eGov.kz порталына немесе eGov Mobile қосымшасына кіру;
-
Арнайы өтінішті толтырып, ЭЦҚ арқылы қол қою;
-
Жаңа фотосуретті жүктеу (белгіленген талаптарға сай);
-
Жүйе азаматтың тіркелу деректері мен фотосуретті тексереді;
-
Мемлекеттік баж салығын төлеу;
-
Өтініш мақұлданған соң, дайын құжатты ХҚКО-дан алып кетуге болады.
Бұл жаңашылдық 2026 жылғы 31 наурызға дейін пилоттық режимде сынақтан өткізіледі. Жоба оң нәтиже берсе, қызметті кең ауқымда пайдалану жоспарланып отыр.
«Жетісу-Ақпарат»
