Алматы облысы әкімі Амандық БАТАЛОВТЫҢ қатысуымен жиын өтті. Оған басқарма басшылары, аудан, қала әкімдері, тағы басқа лауазымды тұлғалар қатысты.
Амандық Ғаббасұлы алдымен жиында қаралатын негізгі мәселелерге тоқталып, жалпы тоғыз айдың қорытындысына сәйкес аймақтың әлеуметтік-экономикалық дамуының оң нәтиже көрсетіп отырғанын атап өтті.
– Барлық салада өсім бар. Бірақ бұған тоқмейілсімей, аймақ экономикасын көтеру бағытындағы жұмыстарды күшейту керек. Жыл аяқталуға жақын. Сол себепті Үкімет тарапынан бөлінген қаражат мақсатты жұмсалып, толық игерілуі тиіс, – деді облыс басшысы.
Бұдан соң аймақ басшысы тарапынан өңірлерде жүріп жатқан құрылыс жұмыстары бойынша кем-кетіктер сынға алынып, орын алған кемшіліктер сараланды. Әсіресе, жол бойынан орын тебетін нысандарды салу кезінде заңдылықтарды сақтамай, қызыл сызықтан асырып құрылыс жұмыстарын жүргізуге жол беріп отырғандарға ескерту жасалып, жұмыстары қатаң сынға алынды.
– Жол бойында заңсыз салынып жатқан нысандардың құрылысы тоқтатылуы тиіс. Бұл қатаң бақылауда болады. Жалпы, әр әкім өзінің ауданындағы жағдайды біліп отыруы тиіс. Экономикамен айналысып, жұмыс істеңіздер! Құрылысты жандандырып, «7–20–25», «Бақытты отбасы», «Ауыл – ел бесігі» сияқты мемлекеттік бағдарламалардың қалай жүзеге асырылып жатқанын қадағалауға алыңыздар, – деді Амандық Ғаббасұлы. Сонымен бірге, кейбір өңірлерде құрылыс қарқынының саябырсып, осы салаға деп қарастырылған қаражаттың игерілу деңгейінің төмендеуінің себеп-салдары сұралды. Бүге-шігесіне дейін талқыланды. Инвестиция тарту бойынша жұмыстардың ойдан шықпай отырғаны да сөз болды.
Осы ретте: «Құрылыс саласына жауапты басшылар мен әкімдердің кесірінен көбіне көпқабатты тұрғын үйлер мен басқа да нысандардың құрылысы өз мерзімінде аяқталмай, пайдалануға беру кешіктіріледі. Ал оны халық «қашан үйлі боламыз?» деп күтіп отыр. Неге осыған көңіл бөлмейсіздер? Үкіметтің беріп отырған ақшасын да уақытылы жұмсай алмайсыздар. Қаржы жыл соңына дейін толық игерілетін болсын», – деп қадап тапсырды облыс әкімі.
Осыған байланысты Талғар, Іле, Қарасай, Еңбекшіқазақ, Ұйғыр, тағы басқа аудандар мен Қапшағай, Текелі қалаларының әкімдерін, салаға жауапты басқа да жетекшілерді, құрылыс мердігерлерін орындарынан тұрғызып, жауап алды. Енді бірқатарына сөгіс жарияланды.
Бюджеттің кіріс бөлігін толықтыру, салық түсімдері, төлемдер, өңірлерді газдандыру мәселелері де назарға алынды. Сонымен бірге, облыстық экономика және бюджеттік жоспарлау басқармасының басшысы Жомарт Әмірханов пен облыстық қаржы басқармасының басшысы Данияр Әлімбаевтың баяндамалары тыңдалды.
Айгүл БАЙБОСЫНОВА
Сурет ғаламтордан алынды
Алматы облысы
