Жетісу облысында былтыр қазаннан бастап жүргізілген профилактикалық жұмыстардың нәтижесінде өрт саны азайды (2024 жылы 109 оқиға тіркелсе, 2025 жылы 62 жағдай болды). Ал улы газбен уланудың 3 жағдайы тіркелді, онда 6 адам зардап шекті, өрт кезінде 5 адам қаза болып, 9 адам жарақат алды, – деп хабарлайды 7su.kz ақпараттық порталы.
Ол жөнінде Бейсен Құранбек атындағы журналистер үйінде болған «Жылыту маусымындағы өрт қауіпсіздігін қамтамасыз ету» тақырыбындағы брифингте айтылды. Спикер болған Жетісу облысы төтенше жағдайлар департаментінің мемлекеттік өрт бақылау басқармасының бас маманы Еламан Әубәкіровпен аталған басқарманың аға инженері Ілияс Жайнақов кеңінен тарқатты.
Жетісу облысында жылыту маусымында өрттің алдын алу мақсатында «2025-2026 жылдарға арналған тұрғын секторда өрт қауіпсіздігін қамтамасыз ету жөніндегі іс-шаралар жоспары» іске асырып жатыр.
Былтыр 15 тамыз бен 22 қараша аралығында тұрғын үй секторында өрт қауіпсіздігі айлығы өтті. Аталған кезеңде рейдтер ұйымдастырылып, тұрғындармен кездесулер болып, білім беру ұйымдарында интерактивті сабақтар өтті.
Әлеуметтік осал санаттағы 7 761 отбасының тұрғын үйлері толық қамтылып, өрт қауіпсіздігі талаптары түсіндірілді. Газдың қауіпті шоғырлануын анықтайтын 2 322 датчик орнатылды.
Мамандардың айтуынша, өрттің негізгі себептері – электр сымдарының тозуы мен пеш жабдықтарын орнату және пайдалану кезінде қауіпсіздік талаптарының сақталмауы. Мұндай жағдайлар көбіне 30-50 жылдан астам уақыт бұрын салынған тұрғын үйлерде тіркелуде.
Қазіргі уақытта жылыту маусымындағы өрттің алдын алу шаралары тұрақты бақылауда және маусым соңына дейін жалғасады.
