«Қайрат» клубының қақпашысы Темірлан Анарбековтың Instagram желісіндегі жазбасы бірнеше сағаттың ішінде ондаған мың лайк пен пікір жинады, – деп хабарлайды 7-su.kz ақпараттық порталы.
Футболшы Чемпиондар лигасының топтық кезеңінде негізгі құрамда алғаш рет алаңға шыққаннан кейінгі әсерімен бөліскен.
«Чемпиондар лигасының топтық кезеңіндегі бірінші ойын, тағы бір балалық арманым орындалды», – деп жазды Анарбеков.
Небәрі 14 сағат ішінде жазбаға 32 мыңнан астам лайк жиналып, 1200-ден астам пікір қалдырылған. Қазақстандық жанкүйерлер қақпашының ойынына жоғары баға беріп, оның есімі қазақ футболының тарихында қалатынын атап өтті.
«Темірланның арқасында біз “Реал Мадридті” тікелей эфирде көрдік. Темірлан – аңыз адам, ол Қазақстан футболының тарихын жасады», «Көз тимесін», «Анарбеков – ең үздік. “Реалға” қарсы ойында алаңға шыққанда, біз бес гол жібермес едік», «Үздік қақпашы», – деп жазды жанкүйерлер.
Айта кетейік, Анарбеков жарақатына байланысты Алматыда өткен «Реалға» қарсы ойында алаңға шықпаған. Оның Чемпиондар лигасындағы алғашқы матчы кипрлік «Пафос» командасына қарсы өтіп, тең есеппен аяқталған.
Матчтан кейін әлеуметтік желіде футболшы жайлы оң пікірлер көбейіп, УЕФА оны турдың үздік қақпашылары қатарына қосты.
