Қазақстанның бірінші ракеткасы Елена Рыбакина 2026 жылғы Australian Open турнирінде чемпион атанып, мансабындағы екінші «Үлкен дулыға» титулын жеңіп алды. Мельбурндегі «Rod Laver Arena» кортында өткен финалда қазақстандық теннисші әлемнің бірінші ракеткасы беларус Арина Соболенкомен үш сетке созылған тартысты кездесу өткізді. Ойын 2 сағат 34 минутқа созылып, Рыбакинаның пайдасына 6:4, 4:6, 6:4 есебімен аяқталды.
Рыбакина осыған дейін ол 2022 жылы Уимблдон турнирінде топ жарып, Қазақстан тарихындағы алғашқы «Үлкен дулыға» чемпионы атанған болатын. 2025 жылы маусымның қорытындысы саналатын WTA Finals турнирінде жеңіске жетіп, әлемдік элитадағы орнын айқындай түскен. Ал Мельбурндегі чемпиондық титул оның жоғары деңгейдегі тұрақтылығын тағы бір мәрте дәлелдеді. Қазіргі таңда Елена Рыбакинаның қоржынында WTA деңгейіндегі 12 титул бар, соның ішінде екеуі – «Үлкен дулыға», біреуі – маусым қорытындысы турнирінің жүлдесі.
Финалға дейін Арина Соболенко 11 матч қатарынан жеңіске жетіп, «Australian Open» қарсаңында өткен Брисбен турнирінде чемпион атанған еді. Айта кетерлігі, Соболенконың кейінгі жеңілісі де дәл осы қазақстандық теннисшіге қарсы ойында тіркелген еді.
Бұл матч екі спортшы арасындағы 15-ші жеке кездесу болды. Қазіргі таңда өзара ойындардағы есеп 8:7 – әзірге Соболенконың пайдасына.
Australian Open-тегі тарихи жеңістен кейін Елена Рыбакина WTA әлемдік рейтингінде үшінші орынға көтерілді. Бұл – Қазақстан теннисі тарихындағы ең жоғары нәтижелердің бірі.
«ЖЕТІСУ-АҚПАРАТ»
