Қазақстандық теннисші Елена Рыбакина ресми түрде Гиннесс рекордтар кітабына енді, – деп хабарлайды 7-su.kz ақпараттық порталы.
Спортшы теннис тарихындағы ең ірі жүлде қоры бойынша рекорд орнатты.
Эр-Риядта (Сауд Арабиясы) өткен WTA финалдық турнирінде жеңіске жеткені үшін Рыбакина 5,235 миллион доллар, яғни шамамен 2,7 миллиард теңге сыйақы алды. Бұл қаржы – теннис спорты тарихында бір турнир үшін берілген ең ірі жүлде.
Бұған дейінгі рекорд беларусьтік Арина Соболенко мен испандық Карлос Алькарасқа тиесілі болатын. Олар 2025 жылдың қыркүйегінде өткен АҚШ ашық чемпионатында (US Open) жеңіске жетіп, әрқайсысы 5 миллион доллар табыс тапқан.
Бұл – Рыбакинаның Гиннесс кітабындағы алғашқы жетістігі емес. 2024 жылы Аустралия ашық чемпионатында Анна Блинковаға қарсы матчта 22:20 есебімен «Үлкен дулыға» турнирлері тарихындағы ең ұзақ тай-брейк рекордын жаңартқан еді.
Жалпы алғанда, 26 жастағы Елена Рыбакина WTA турнирлерінде жекелей сында 11 титул жеңіп, мансабында 24,438 миллион доллар табыс тапқан.
