Қазақстанда мемлекеттік спорттық тапсырыс бағдарламасы аясында балалар спортын дамытуға 50 млрд теңгеден астам қаржы бөлінді. Бұл туралы ҚР Туризм және спорт министрлігінің Олимпиадалық емес спорт түрлері және бұқаралық спортты дамыту басқармасының басшысы Айдос Есенәлиев мәлімдеді, – деп хабарлайды 7-su.kz ақпараттық порталы.
Министрлік мәліметінше, 2021 жылдан бері жүзеге асырылып келе жатқан мемлекеттік спорттық тапсырыс бағдарламасы балалар мен жасөспірімдердің спортпен тұрақты айналысуына мүмкіндік беріп отыр. Қазіргі таңда еліміз бойынша 4 пен 17 жас аралығындағы 228 мыңнан астам бала жеті мыңнан астам спорт секциясына тегін қатысады.
Балалар мен жасөспірімдерге арналған спорт секцияларын қаржыландыру мемлекеттік спорттық тапсырыс шеңберінде бекітілген қағидаларға сәйкес жүзеге асырылады. Бағдарламаны іске асыруға жергілікті бюджеттерден 50 млрд теңгеден астам қаражат бөлінген.
Сонымен қатар елімізде бұқаралық спортты дамыту көрсеткіштері де артып келеді. 2025 жылдың қорытындысы бойынша спортпен және дене шынықтырумен жүйелі түрде айналысатын қазақстандықтардың үлесі 44,5 пайызға жеткен. Бұл шамамен 8,5 миллионнан астам адамды құрайды. Ал 2029 жылға қарай аталған көрсеткішті 50 пайызға дейін жеткізу жоспарланып отыр.
Туризм және спорт министрлігінің дерегіне сәйкес, Қазақстанда жыл сайын 25 мыңнан астам бұқаралық спорттық іс-шара ұйымдастырылады. Оларға 1,5 миллионнан астам адам қатысады. Аталған іс-шаралар қатарында марафондар, жүгіру жарыстары, велошерулер, спорт фестивальдері, аула турнирлері, сондай-ақ мектеп және студенттер арасындағы жарыстар бар.
2026 жылдың басындағы жағдай бойынша халықтың спорт инфрақұрылымымен қамтылу деңгейі 59,6 пайызды құрады. Бүгінде елімізде жалпы саны 26 518 спорт нысаны жұмыс істейді. Оның ішінде 13 154 дене шынықтыру-спорт нысаны, білім беру ұйымдары жанындағы 11 880 спорт нысаны және 1 484 спорт мектебі бар.
Мамандардың айтуынша, балалар спортын қолдау мен спорт инфрақұрылымын дамыту халықтың дене белсенділігін арттыруға және салауатты өмір салтын қалыптастыруға ықпал етеді.
