Ұлттық ұланның Орталық музейі ерекше құнды жәдігермен толықты. Қазақстанның аңызға айналған боксшысы Геннадий Головкин музей қорына өз қолтаңбасы қойылған бокс қолғабын сыйға тартты, – деп хабарлайды 7-su.kz ақпараттық порталы.
Бұл сый – құқықтық тәртіп әскерлерінің тарихын толықтыратын ғана емес, жас әскери қызметшілерді жігерлендіретін тағылымды мұра ретінде бағалануда.
Аталған жаңалық Ұлттық ұланның елордалық 5573 әскери бөлімінде мерзімді әскери қызметін өтеп жүрген Марлен Сұрамаев үшін ерекше мәнге ие болды. Алматы қаласынан әскерге шақырылған сарбаз бала кезінен Геннадий Головкиннің жекпе-жектерін қызығушылықпен тамашалап, оның еңбекқорлығы, сабырлылығы мен чемпиондық мінезін өзіне үлгі тұтып өскен.
Марленнің өзі де бокспен ұзақ жылдар бойы кәсіби түрде айналысқан. Ол – Республикалық спорт колледжінің түлегі, спорт шеберлігіне кандидат, Қазақстан чемпионатының екі дүркін күміс жүлдегері және Алматы қаласының чемпионы.
Әскери қызметшінің айтуынша, Геннадий Головкиннің өмір жолы оған үлкен жетістікке тек үздіксіз еңбек пен темірдей тәртіп арқылы ғана жетуге болатынын ұғындырған.
Жуырда Марлен Сұрамаев Құрмет қарауылы ротасының құрамында Геннадий Головкиннің есімі Даңқ залына енгізілуіне арналған құттықтау бейнеролигінің түсіріліміне де қатысқан. Ал боксшының өз қолтаңбасы қойылған қолғабын Ұлттық ұлан музейіне табыстағаны туралы жаңалықты ол ерекше қуанышпен қабылдағанын айтады.
Геннадий Головкиннің қолтаңбасы қойылған бокс қолғабы музей қорындағы ең құнды жәдігерлердің біріне айналды. Енді бұл естелік Ұлттық ұланның Орталық музейінде сақталып, жас сарбаздарға елге қызмет ету, тәртіп пен табандылықтың маңызын дәріптейтін символдық мұра ретінде ұсынылады.
