Словенияның Камник қаласында садақ атудан өткен дәстүрлі «Veronica’s Cup» халықаралық турнирінде Қазақстан ұлттық құрамасы ересектер арасында қос жүлдеге ие болды. Жетісулық садақшы Ильфат Абдуллин жекелей сында топжарды. Биыл бәсекеге әлемнің 30-ға жуық мемлекетінен 330-дан астам мерген қатысты, – деп хабарлайды 7-su.kz ақпарттық порталы.
Классикалық садақ атудан ерлер арасындағы бәсекенің финалында отандасымыз Ильфат Абдуллин шеберлігін танытты. Ол шешуші кезеңде Үндістан спортшысы Сачин Гуптаны жеңді.
Одан бөлек құралмалы садақпен (компаунд) атудан әйелдер арасындағы командалық сында Қазақстан құрамасы үздік үштікті түйіндеді. Ел намысын қорғаған Виктория Лян, Роксана Юнусова мен Адель Жексенбинова кіші финалда Люксембург құрамасынан басым түсіп, қола жүлдені иеленді.
Айта кетейік, осыған дейін U18 және U21 жас санаттарында өнер көрсеткен жасөспірімдер мен жастар құрамасы да бірнеше жүлдеге ие болған еді. Жалпы жарыс қорытындысы бойынша, Қазақстан құрамасы медальдар есебінде Италиядан кейін 2-орында тұр.
