Еліміздің спорт тарихында айтулы жетістік тіркелді. Теннис саңлағы Елена Рыбакинаның Индиан-Уэллс турниріндегі жеңісті жолы қазақстандық жанкүйерлер үшін нағыз мақтанышқа айналды – деп хабарлайды 7-su.kz ақпараттық порталы.
АҚШ-тың Индиан-Уэллс қаласында өтіп жатқан WTA 1000 сериясындағы турнирдің ширек финалында Қазақстанның бірінші ракеткасы Елена Рыбакина америкалық Джессика Пегуламен кездесті. Матчтың алғашқы сетінде отандасымыз 6:1 есебімен басым түсіп, қарсыласына еш мүмкіндік қалдырмады. Екінші партия тартысты өтіп, Пегула 4:1 және 6:5 есептерімен алға шыққанына қарамастан, Рыбакина жағдайды өз пайдасына шеше алды. Нәтижесінде 7:6(4) есебімен жеңіске жеткен қазақстандық спортшы жартылай финалға жолдама алды. 1 сағат 28 минутқа созылған аталған кездесу Еленаның кәсіби шеберлігі мен психологиялық төзімділігін тағы бір мәрте дәлелдеді.
Live-tennis.eu деректеріне сүйенсек, аталған жеңіс Елена Рыбакинаға WTA әйелдер арасындағы жекелей разряд рейтингінде екінші орынға көтерілуге мүмкіндік береді. Қазіргі таңда Рыбакинаның қоржынында 7523 ұпай бар. Осылайша, ол 7413 ұпайы бар Польша өкілі Ига Швентекті басып озды. Рейтинг көшбасшысы ретінде 10415 ұпаймен Арина Соболенко тұр.
Скриншот live-tennis.eu сайтынан
Еленаның аталған жетістігі Қазақстан теннисі үшін бұрын-соңды болмаған тарихи нәтиже. Енді Елена Рыбакина финалға жолдама алу үшін украиналық Элина Свитолинамен бақ сынайды. Свитолина ширек финалда Ига Швентекті турнирден шығарып тастап, жоғары дайындығын көрсетті. Шешуші матч 14-наурызда өтеді. Спорт сарапшылары Еленаның қазіргі бабын жоғары бағалап, оның турнир чемпионы атануына мүмкіндігі зор екенін айтуда.
Рейтингтің ресми жаңартылуы келесі аптада күтілуде. Осы оқиға еліміздегі жас теннисшілер үшін үлкен ынталандыру болары анық. Отандасымыздың әрбір соққысы мен жинаған ұпайы Қазақстанның әлемдік спорт картасындағы орнын нығайта түспек. Сәттілік пен жеңіс Елена Рыбакинаның серігі болсын деп тілейміз. Осындай биік белестер ел абыройын асқақтата береді.
