Жетісу облысында қар құрсауында қалған азаматтар құтқарылды, – деп хабарлайды 7-su.kz ақпараттық порталы.
Алакөл ауданында республикалық маңызы бар Достық – Үшарал автожолының 110-шақырымында қарға кептеліп қалған жүк көлігі туралы полицияға хабар түскен. Көлік кабинасында екі адам болған.
Оқиға орнына патрульдік полиция батальонының қызметкерлері Е.Абылқасымов пен Е.Рысбеков, сондай-ақ ТЖД қызметкерлері жедел түрде шықты.
Қатты жел мен қалың қарға қарамастан құтқарушылар оқиға орнына жетіп, қарға батып қалған жүк көлігін анықтаған. Жүргізуші мен жолаушы көліктен өз күштерімен шыға алмаған. Қызметкерлер шұғыл түрде эвакуация жұмыстарын ұйымдастырып, азаматтарды аман-есен құтқарды.
Полиция тұрғындарды ауа райының қолайсыздығын ескеріп, жолға шығарда қойылған шектеулерге назар аударуға шақырады.
