Футболдан Премьер-лиганың 17 тур ойындары аясында «Жетісу» Талдықорғандағы Орталық алаңда «Ордабасымен» (Шымкент) ойнап, 1:0 есебімен жеңіске жетті. Бұл жеңіс көптен көңілі күпті болған жетісулықтарды желпінтті.
Ала-құла ойын көрсетіп, турнирлік кестеде көптің арасында келе жатқан «Жетісудың» биылғы ел чемпионатындағы бұл бар болғаны үшінші жеңісі. 17 ойынның жетеуінде жеңіліп, жетеуінде тең түскен. Өз қақпасына 25 гол өткізіп, 14 гол салды. Турнирлік кестеде 16 ұпаймен алдына «Қызыл Жарды» салып (19 ұпай), «Қайсардан» жоғарылап, (14 ұпай) 10-орында тұр.
Еуролиганың алғашқы айналымында «Торпедо Кутаисиден» (Грузия) жеңілген «Ордабасы» Талдықорғанға 3 ұпайды қармап қалуға келгендігі анық. Оны ойынның алғашқы минуттарынан-ақ аңғартты. Шабуылды үдетіп, қақпаға бағыттаған соққыларды еселей түсті. Денис Кавлиновтың ептілігі көрініп, бірнеше қауіптің бетін тойтарды. Қақпа маңдайшасы бір емес екі-үш мәрте жетісулықтарды голдан құтқарып қалды. Тоқсан минут бойы мәнсіз өрілген ойын «Жетісу» сапында дебюттік ойынын өткізуге қосалқы құрамнан алаңға кірген Рафаэль Саксесстің голынан кейін өзге арнаға бұрылды. Жанкүйерлер орындарынан секіріп, голды шат-шадыман қабылдады. Рафаэль «Ордабасы» қорғаушысы Шериф Джимоның қателігінен кейін қақпашы Бекхан Шайзадамен бірге-бір шығып, оңай гол салып кетті. Рафаэль биылғы ел чемпионатында «Жетісу» сапынан гол салған сегізінші ойыншы. Осыған дейін Руслан Болов (екінші кезеңде командадан кетті) 4 гол, Дмитрий Шмид 2 гол, Ринат Серікқұл 2 гол, Максим Ковель 2 гол, Аслан Ахмедов, Максим Житнев, Жансұлтан Мұхаметханов гол салған еді. Бірінші айналымнан кейін «Жетісу» сапынан Боловтан басқа отбасылық жағдайына байланысты Мақсат Тәйкенов пен Тимур Рудосельский кетті.
Ойыннан кейін «Жетісу» футбол клубының бас бапкері Самат Сымқов «Соңына дейін мінез көрсетіп, жеңісті жұлып алғаны үшін ойыншыларға ерекше алғыс айтқым келеді. Матч жақсы өтті. Алаңдағы әр ойыншыны ерекше атап өтсем болады», – деді. Енді «Жетісу» 26 шілдеде Семей қаласында «Елім-ай» командасымен ойнайды.
Серік Қантай
