Б. Құранбек атындағы Журналистер үйінде Жетісу облысында бұқаралық спортты дамыту және мамыр айында өтетін ірі спорттық бағдарламаларға арналған брифинг өтті.
Жиында өңірдегі спорт саласының қазіргі жағдайы, бұқаралық спортты кеңінен насихаттау және тұрғындарды салауатты өмір салтына тарту бағытындағы атқарылып жатқан жұмыстар таныстырылды. Облыстық дене шынықтыру және спорт басқармасының мәліметінше, 2026 жылдың мамыр айында Жетісу өңірінде 20-дан астам ірі спорттық шара өткізу жоспарланған. Олардың қатарында республикалық деңгейдегі біріншіліктер, облыстық турнирлер және дәстүрлі жарыстар бар. Бұл іс-шаралар шамамен 6 мыңға жуық спортшы мен қатысушыны қамтиды.
Айдың негізгі спорттық оқиғаларының бірі – Талдықорған қаласында өтетін көкпардан Қазақстан Республикасының XXV чемпионаты. Сонымен қатар ауыр атлетикадан ерлер мен әйелдер арасындағы ел біріншілігі, армрестлинг пен тоғызқұмалақтан республикалық бәсекелер, сондай-ақ садақ атудан Қазақстан кубогі ұйымдастырылады.
Ұлттық спорт түрлерін дамытуға да ерекше көңіл бөлінген. «Сиверс алма гүлдеуі» фестивалі аясында қазақ күресі, тоғызқұмалақ және асық ату сияқты ұлттық ойындар өтеді. Ал 9 мамыр – Жеңіс күніне орай облыс әкімінің кубогына бәйге және бәйге түрлері бойынша Қазақстан чемпионаты жоспарланып отыр.
Көкпардан ересектер арасындағы Қазақстан Республикасының XXV чемпионаты 1-9 мамыр аралығында өтеді. 1 мамыр – қатысушыларды қабылдау күні болса, негізгі бәсекелер 2-9 мамыр күндері ұйымдастырылады. Биылғы дода плей-офф жүйесімен өтеді. Жүлде қоры 22,5 млн теңгені құрайды. Сонымен қатар «Үздік шабуылшы ат», «Үздік қорғаушы ат», «Үздік жекпе-жек ат» және «Үздік ойыншы» аталымдары бойынша жеңімпаздар анықталады, – деді ММ-нің Ұлттық және бұқаралық спорт түрлері мен спорттық инфрақұрылымды дамыту бөлімінің басшысы Ғазиз Аманжолұлы.
Жасөспірімдер мен жастар спортын қолдау мақсатында бокс, еркін және грек-рим күресі бойынша республикалық турнирлер, сондай-ақ волейбол, баскетбол, велоспорт және жеңіл атлетикадан облыстық жарыстар өтеді. Бұдан бөлек, «Спорт – есірткіге қарсы» ұранымен футбол және волейбол турнирлері ұйымдастырылады.
Саладағы спорттық инфрақұрылым да кезең-кезеңімен дамып келеді. Соңғы үш жылда облыста 39 жаңа спорт нысаны пайдалануға берілген. Бұл тұрғындардың бұқаралық спортпен тұрақты айналысуына және түрлі деңгейдегі жарыстарды сапалы өткізуге мүмкіндік жасап отыр.
Жалпы, мамыр айына жоспарланған спорттық күнтізбе өңірде бұқаралық спортты дамыту, салауатты өмір салтын дәріптеу және жас спортшыларды қолдау бағытындағы жүйелі жұмыстың жалғасын көрсетеді.
Аяулым Шынгаева
