Талдықорған қаласындағы өзекті мәселелердің бірі – көпқабатты тұрғын үй аулаларының жай-күйі. Әсіресе, соңғы жылдары бой көтеріп жатқан жаңа шағын аудандарда бұл мәселе айқын байқалады. Жолдардың тозуы мен шұңқырлардың көбеюі – көлік жүргізушілері мен жаяу жүргіншілер үшін қиындық тудыруда.
Мәселен, «Болашақ» ықшамауданының 5, 6, 7, 8 үйлерінің аулаларына көз салсаңыз, ескі шұңқырдың қасынан жаңасы шығып жатыр. Тұрғындар өз беттерінше тас төгіп, уақытша амал қылған. Бұл жағдай кемі 2-3 жылдан бері осы кейіпте. Дәл осындай көрініс «Болашақ» ықшамауданындағы 32, 33, 34, 38 үйлерде де қайталануда. Мұнда да тұрғындар шұңқырды шағырмен толтырғанымен, ол сыртқа шашылып, бұрынға қалыпына енуде.
Жаңадан жөнделіп, қазылып, артынан дұрыс жабылмаған жерлер де аз емес. Биыл ғана жөндеу жүргізілген кей аумақтарда да шұңқырлар қайта пайда бола бастаған. Бұл келесі жылдағы жағдайдың қалай боларын аңғартады.
«Бірлік» шағын ауданының 7-үйінің ауласы да осы мәселеден шет қалмаған. Аула көлікке толы болғандықтан, тек бір бағытпен ғана қозғалу мүмкін. Ал жолда кездесетін терең шұңқырлар – тұрғындар үшін үлкен қолайсыздық туғызып отыр. Оларды өз күштерімен таспен толтырып, амал етіп отыр. Әйтпесе, көлікке зақым келуі әбден мүмкін.
Аула – тұрғындардың күнделікті өмірінің маңызды бөлігі. Сондықтан бұл мәселе билік назарынан тыс қалмай, нақты шешімін табуы тиіс.
Мәулен Әнербай
