Тәуелсіздік
Еркіндігім, елдігімнің құны едің,
Талай жылдар бодандықта түнедім.
Арманысың менің байтақ жерімнің,
Аңсап күткен байырғыдан Ұлы елім.
Тәуелсіздік – өмірімнің тірегі,
Сен деп соққан әр қазақтың жүрегі.
Туған жердің қадірісің әуелден,
Қасиетіңді барлығы да біледі.
Туған жер деп намыстары кернеген,
Батырларым елді жауға бермеген.
Тәуелсіздік, сен қашанда биіксің,
Жер-Ананың бесігінде тербелген.
Халқының ұлы (Мағжан ақынға)
Алланың құлы,
Халқының ұлы,
Шайыры мынау даланың.
Зерделі зерек,
Өзгеден ерек,
Кеудесі өлең дананың.
Сертіне берік,
Жалғызға серік,
Сүйікті болған сүйгенге.
Алаш деп өктем,
Өмірі өткен,
Тікен тірлікте, күйбеңде.
Ғылымға асық,
Өмірге ғашық,
Жырларын оқып жаттаңдар!
Жаралған нұрдан,
Сөреде тұрған,
Мағжанды мәңгі сақтаңдар.
Жеңіс күні
Жеңіс жетті жылдар салып араға,
Жаңғырды ойлар жаңашалау санада.
Қан майданнан туған жерге оралды,
Сұм соғысқа жалғыз кеткен бала да.
Аналардан жас төгілді, жан ұшып,
Талай боздақ кетті ажалмен алысып.
Маңдай термен суғарылды жылғалар,
Қатыгез жау тұрған сәтте қан ішіп.
Елге оралды нағыз батыр, нағыз ер,
Бізде қалды атақоныс, бағзы жер.
Баға жетпес жеңістің әр күніне,
Бейбіт күнде түн қуанып, таң күлер.
Тілім менің
Тілім менің қасиетті қазынам,
Әуел бастан құдіретіңе бас ұрам.
Жер жаһанға жар саламын өзің деп,
Сен арқылы абыройымды асырам.
Ана тілім, айбынымсың, арымсың,
Маңдайыма Алла берген бағымсың.
Керек кезде қиып түсер қылышсың,
Қажет сәтте күйдіретін жалынсың.
Сен арқылы әуелетем әнімді,
Сен арқылы мәуелі етем бағымды.
Сен арқылы ана болып әлдилеп,
Сен арқылы тұғырлы етем тағымды.
Әнел Қисметова,
Талдықорған қаласы
